Дьокуускай куоракка уонна Мииринэйгэ полиция оперативниктара уорууга уорбаланааччылары туттулар.
Киин куорат полициятыгар биир дьахтар хоспоҕуттан персидскэй көбүөрдэрин уорбуттарын туһунан сайабылыанньа киллэрбит.
Уорууга уорбаланааччы — ыаллыы олорор 23 саастаах уол эбит. Уоруллубут икки көбүөрү кини дьиэтиттэн булбуттар. Бэйэбэр туттаары ылбытым диэбит.
Барыллаан быһаарыынан, кини ыала дьахтар хоспоҕор көбүөрдэри уурбутун көрөн, уоруон баҕарбыт. Уонна дьахтар дьиэтиттэн барарын кэтээн туран, хоспох күлүүһүн алдьатан киирэн, ылан тахсыбыт.
Эмиэ Дьокуускайга биир кыбартыыраттан тэлэбиисэр уорбуттар. Дьахтар бу дьиэтин куортамҥа биэрэр эбит, ону бэрэбиэркэлии кэлбитэ — тэлэбиисэрэ мэлигир.
Уорбаланааччыны туппуттар — бу кыбартыыраны куортамнаан олорбут, Бүлүүттэн төрүттээх 32 саастаах киһи тэлэбиисэри ломбарга илдьэн туттарбыт уонна ол харчытынан ( 3000 солк.) арыгы атыыласпыт.
Тэлэбиисэри хаһаайкаҕа төннөрбүттэр.
Мииринэй куоракка биир дьахтар банкоматтан харчы уста сатаабытын, банкомат тоҕо эрэ биэрбэтэх, ол иһин соннук баран хаалбыт.
Онтуката баара, банкомат тохтуу түһэн баран, ол 10 тыһ. солк. харчытын биэрбитин, дьахтар тахсаатын кытта киирбит 46 саастаах киһи бэйэтигэр ылбыт. Чиэһинэй киһи эбитэ буоллар, эккирэтэн тахсан, дьахтарга харчытын биэриэхтээх этэ буоллаҕа — ону суох, тус наадатыгар туттубут.
Бу чахчыларынан «уоруу» ыстатыйанан холуобунай дьыалалар тэриллибиттэрин туһунан СӨ ИДьМ-тын пресс-сулууспата иһитиннэрдэ.
Биһиги корр., «Саха сирэ» хаһыат, edersaas.ru
Хаартыска: интэриниэттэн.