Полиция оперативниктара Дьокуускай куоракка тахсыбыт ханнык уоруулары арыйдылар? Ол туһунан СӨ ИДьМ-тын пресс-сулууспата иһитиннэриилэриттэн билсиҥ.
Көмүс оҥоһуктары
Дьуһуурунай чааска 25 саастаах кыыс эрийэн, дьиэтиттэн ювелирнай киэргэллэрэ сүппүттэрин туһунан эппит. Уорбаланааччы быһыытынан, 21 саастаах кыыс тутуллубут.
Барыллаан быһаарыынан, кыыс дьиэтигэр суох кэмигэр аймаҕа уол кэмиттэн кэмигэр кэлэн көрөр, бэрэбиэркэлиир эбит. Биир оннук сырыытыгар уол билэр кыыһын илдьэ кэлбит. Онуоха баара, бу кыыс биир түгэҥҥэ, уол көрбөтүгэр, хоско баар кыһыл көмүс браслеты, сыапачканы уонна эр киһи биһилэҕин уорбут.
Уорбут оҥоһуктарын ломбарга туттаран, харчы ылан, талбытынан ону-маны атыыласпыт. 37 тыһ. солк. харчыга.
Тимир турбалары
Тутуу тэрилтэтиттэн тимир турбалары уорбуттар. Бу уорууга уорбаланан, Алдантан төрүттээх, ханна да үлэлээбэт 21 саастаах уол тутуллубут.
«Чэпчэки» харчы оҥостор сыалтан, тутуу базатыгар тимир турбалар сыталларын эрдэттэн өйдөөн көрөн, олору уоран баран, атыылыырга санаммыт. Биир «үтүө» күн кэлэн, ол былааннаммытын олоххо киллэрэн, манипулятор көмөтүнэн тиэйэн барбыт.
Дьолго, оперативниктар кинини түргэнник буланнар, турбалары барытын хаһаайыныгар төннөрбүттэр.
Инструменнары
Эмиэ тутуу тэрилтэтигэр уоруу тахсыбыт — бу сырыыга будкаттан инструменнары сойбоппуттар. Уорууга уорбаланааччы — эмиэ эдэр киһи буолан биэрбит — колледжка үөрэнэр 22 саастаах устудьуон.
Бу уол биир түүн тутуу бара турар сиригэр кэлэн, аана аһаҕас будкаҕа киирэн, тутуу инструменнарын ылан тахсыбыт.
Уорбут тэриллэрин ломбарга туттарбыт эрээри, харчытын ылбакка хаалбыт — оперативниктар туппуттар.
Бытовой техниканы
Жатайга биир дьахтар даачатыттан 5600 солк. сууммалаах маллара сүппүттэр. Бу уоруу «сылааһына» арыллыбыт — 15 саастаах уолчаан эбит.
Барыллаан быһаарыынан, бу оҕо даачаҕа ким да суоҕун билэн, аан күлүүһүн алдьатан киирэн, дьиэттэн электронагреватель, электрическэй чаанньык уонна радиоприемник уорбут.
Суумканы кытта, онно баары барытын
Сороҕор малларбытын уоруйахтарга бэйэбит «ууран» биэрэбит.
Ол курдук, 42 саастаах дьахтар кыбартыыратын аанын хатаабакка тахсыбытын, подъезка турбут уоруйах өйдөөн көрбүт. Дьахтар тахсан бараатын, кыбартыыраҕа киирэн, аан таһыгар турар суумканы сойбоппут. Онтон онно, дьахтар суумкатыгар буоларын курдук, туох баар наадалаах баайа-мала барыта баар эбит: пааспара, баан каарталара, көмүс киэргэллэрэ.
Урут сууттана сылдьыбыт 33 саастаах уорбаланааччы маҕаһыынтан дьахтар каарталарынан (безконтактнай эбиттэр) бородуукта уонна ис таҥас ылыммыт.
Бу чахчыларынан «уоруу» ыстатыйанан холуобунай дьыалалар тэриллибиттэр.
Хаартыска: интэриниэттэн