Уоруйах кэргэнниилэр сууттаннылар

Ааптар: 
Бөлөххө киир:

Үөһээ Бүлүү улууһугар суотабай сибээс маҕаһыыныгар менеджеринэн үлэлээбит  кэргэнниилэр сууттаннылар. Бу паара 1 мөлүйүөн 952 тыһыынча харчыны уорбут!

edersaas.ru

Суут быһаарбытынан, эр киһи маҕаһыын менеджеринэн үлэлиир кэмигэр харчыны дьаһайар кыаҕын туһанан, үлэтин компьютерыттан интэриниэккэ киирэн, маҕаһыын каассатыгар харчы укпакка эрэ, төлөбүрү ылбыт курдук 37 сымыйа эпэрээссийэни толорбут — барыта 361 тыһыынча солкуобай суумаҕа. Ол харчыны интэриниэккэ букмекерскай хонтуораларга спортивнай уксууларга уган сүүйтэрбит.

Ол сүүйтэрбит харчытын төннөрөөрү уонна маҕаһыын каассатыгар угаары, эр киһи эмиэ бу маҕаһыыҥҥа менеджеринэн үлэлиир ойоҕор харчы уорарга этии киллэрбит, онуоха анараата өйөөччү буолбут.

Инньэ гынан, кэргэнниилэр эрдэттэн киксибит бөлөҕүнэн уопсайа 1 мөлүйүөн 306 тыһыынча солкуобай сууммалаах 100-тэн тахса харчы эпэрээссийэтин толорбуттар, ону таһынан, каассаттан кыралаан уоран, уопсайа 285 тыһыынча солкуобайы сойбоппуттар.

Ол түмүгэр, барыта 1 мөлүйүөн 952 тыһыынча солкуобай харчыны хорон сиэбиттэр.

Суут кэргэнниилэри РФ Холуобунай кодексатын 160-с ыст. 4-с чааһынан, ол эбэтэр, эрдэттэн киксибит бөлөҕүнэн атын киһи ураты бөдөҥ кээмэйдээх баайын-малын хорон сиэһиҥҥэ буруйдааҕынан билинэн, эр киһини 4 сылга көҥүлүн быһары усулуобунайынан ааҕан, 2 сыл тургутар болдьоххо, ойоҕун 3 сылга көҥүлүн быһары усулуобунайынан ааҕан, биир сыл тургутар болдьоххо уурбут.

Суут бириигэбэр таһаарарыгар, сууттанааччылар буруйдарын толору билиммиттэрин, кыра саастаах оҕолордоохторун, саастарынан эдэрдэрин итиэннэ уорбут харчыларын сороҕун төннөрбүттэрин учуоттаабыт.

Бириигэбэр сокуоннай күүһүгэр киирбит.

Бу туһунан СӨ Борокуратууратын пресс-сулууспата иһитиннэрдэ.

Биһиги корр., «Саха сирэ» хаһыат, edersaas.ru

Хаартыска: интэриниэттэн.

+1
0
+1
0
+1
0
+1
0
+1
0
+1
0
+1
0