Уопсастыбанньыктар добровольческай ыстааптара көхтөөхтүк үлэлиир

Ааптар: 
Бөлөххө киир:

Бу күннэргэ Уопсастыбаннай балаата, Ресурснай киин, «Саха сирин айылҕатын харыстыахха!» ыччат волонтерскай киинэ Уопсастыбаннай добровольческай ыстаабы тэрийэн, тахсыылаахтык үлэлии сылдьаллар.

Бу ыстаап чилиэнэ, РФ Дьахталларын Сойууһун Бюротун чилиэнэ, СӨ Дьахталлар уопсастыбаннай тэрилтэлэрин сойуустарын чилиэнэ Анжелика Андреева уопсастыбанньыктар үлэлэрин туһунан бу курдук кэпсээтэ:

Ыстааппыт салайааччыта урбаанньыт, «Японец» маҕаһыын хаһаайына Афанасий Алексеев 20-чэ киһини мунньан үлэлэтэр Дьокуускайга  Орджоникидзе уулуссатын 10 №-дээх дьиэтигэр (Тыа хаһаайыстыбатын министиэристибэтин ойоҕоһугар) баарбыт. Ыстаапка  сарсыарда 9-тан киэһэ хойукка диэри үлэлиибит. 

Сүрүн сорукпут — ойуур баһаарын бохсууга ыытыллар үлэҕэ өйөбүл буолуу. Киирбит харчыны мунньарга анаан расчетнай счет аспыппыт. Ол үбү баһаар буола турар улуустарыгар арааран ыыта олоробут. Ол курдук, «Майтона» хампаанньа 2 мөлүйүөн солкуобайы, урбаанньыт Игорь Олейников 1 мөлүйүөн 500 тыһыынча солкуобайы, тыйаатырдар, балыыһалар, бүддьүөт тэрилтэлэрэ, урбаанньыттар уопсайа 6 мөлүйүөн солкуобайтан тахсаны  ыыттылар.

Биһиги өрөспүүбүлүкэтээҕи ойуур баһаарын бохсор суһал ыстаабы кытта биир санаанан, биир сүбэнэн үлэлиибит. Вице-премьер Дмитрий Садовников Уопсастыбаннай добровольческай ыстаабы кытта мунньахтаан, сүбэлэһэн барбыта. 

Бүгүҥҥү күннээҕи чахчынан, биһиги  372 бэйэлэрин баҕа санааларынан баһаары умулларыан баҕалаах дьону  тэрийэн, «Өлүөнэ очуостара» Айылҕа пааркатыгар, Хаҥаласка, Горнайга, Намҥа ойуур баһаардарыгар тэрийэн ыыттыбыт.

Ыстаап кинилэри туттар тэрилинэн, анал оробуочай таҥаһынан, аһынан-үөлүнэн хааччыйда.

Көмөҕө уонна өйөбүлгэ наадыйар улуустардааҕы ыстааптар биһиэхэ сайаапка түһэрэллэр. Таҥас-сап эрэ буолбакка, улахан тиэхиньикэҕэ тиийэ наадыйалларын этэллэр.Ону биһиги өрөспүүбүлүкэтээҕи суһал ыстаапка тиэрдэн иһэбит. Элбэх киһи тахсар буолан, ас чааһыгар эмиэ үгүс сайаапка киирэр.

Аармыйаттан кэлбит уолаттар, эйэлээх кэмҥэ бойобуой дьайыыларга сылдьыбыт дьон баһаары бохсууга эмиэ  түмсэн, баһаар буола турар сирдэригэр  тиийэн үлэлээтилэр.

Ыстаапка «Үрүҥ көмүс волонтердар» бөлөхтөрө кэлэн кытталлар.   Ким туох этиилээх, көрдөһүүлээх 8 914 824 75 06  төлөпүөҥҥэ эрийэн, ыстааппытын кытта билсиэхтэрин сөп. 

... Бу курдук олус наадалаах кэмҥэ уопсастыбанньыктар түмсэ охсон, уустук балаһыанньаҕа түбэспит улуус олохтоохторугар сүҥкэн өйөбүлү оҥорон, бэрт туһалаах үлэни тэрийэ сылдьаллар. Баҕалаах дьон сүрүннээн өрөбүл күннэргэ ордук кэлэллэр эбит. Кыаллар буоллаҕына, нэдиэлэ курдук үлэлииргэ суоттанан Кэбээйи, Үөһээ Бүлүү, Ньурба курдук ыраах улуустарга баһаары бохсууга дьон наадалар диэн уопсастыбанньыктар көрдөһөллөр. 

Елена ПОТОЦКАЯ, «Саха сирэ» хаһыат, edersaas.ru

Хаартыска — Анжелика Андреева тиксэриитэ.

+1
0
+1
0
+1
0
+1
0
+1
0
+1
0
+1
0