Олунньу 29 күнүгэр IT-Пааркаҕа быйыл 11-с төгүлүн өрөспүүбүлүкэ араас улуустарыттан «Саха сирин лиидэр-кыргыттара» ыччат уопсастыбаннай хамсааһына өрөспүүбүлүкэтээҕи XI форумнарын тэрийэн ыытыаҕа.
edersaas.ru
Былырыын «Кэрэни түстээ» тэрээһиҥҥэ 11 улуустан актыбыыс кыргыттар кэлэн, биэс былаһааккаҕа хайдыһан, уопсастыбаҕа эдэр дьахтар оруолун ырыппыттара.
— Былырыын сүрүннээн дьиэ кэргэн, оҕо төрөөһүнүн, иллэҥ кэми туһалаахтык атаарыы, бэйэ дьыалатын тэринии боппуруостарыгар болҕомтону уурбут буоллахпытына, быйыл Ийэ дойдуга бэриниилээх буолуу сылыгар анаммыт форумҥа кэпсэтии «Сахам сиригэр тапталым» тиэмэлээх ыытыллыаҕа. Иккис сылбытын форуму IT-Пааркаҕа ыытыахпыт. Онно оскуола оҕолоруттан уонна устудьуоннартан саҕалаан, бүгүҥҥү күҥҥэ төрөөбүт дойдуларыгар араас эйгэҕэ ситиһиилээхтик үлэлии сылдьар уопсастыбанньык дьахталлар уопуттарын атастаһыахтара, бэлиитик, урбаанньыт, дьарыктаах буолуу салаатыгар үлэлэһэр, юрист, эмчит, педагог, психолог дьахталлар өрөспүүбүлүкэҕэ ыытылла турар Национальнай бырайыактарга туох үлэ ыытылларын билиһиннэриэхтэрэ, сүбэ-ама биэриэхтэрэ, санааларын үллэстиэхтэрэ, — диэн бэлиэтиир СӨ Дьахтар уопсастыбаннай тэрилтэлэрин сойуустарын бэрэссэдээтэлэ, РФ Дьахталлар сойуустарын Бюротун чилиэнэ Анжелика Андреева.
Былааҥҥа киирбит тэрээһиннэртэн кылгастык билиһиннэрдэххэ, психолог, сексолог Ольга Бородина (@sexolog) кэргэнниилэр чугас сыһыаннарын, өрүү сырдык санааны, үөрүүнү саҕар айылгылаах блогер-ийэ Василика (@vasilika_) уонна кини кэргэнэ, култуура туйгуна, баянист-виртуоз Виктор Винокуров (@dabaiaan), элбэх оҕолоох ийэ, урбаанньыт, «Шоколана» бельгийскай сакалаат маҕаһыыны төрүттээччи Екатерина Макарова (@ekaterina_makarova333),
урбаанньыт, кондитер, блогер Мария Столярчик (@stolyarchikmaria) уо.д.а. интэриэһинэй дьахталлар уонна кинилэр кэргэттэрэ форумҥа кыттан, олохторун кэпсиэхтэрэ, ситиһиилэрин үллэстиэхтэрэ.
Онон бу тэрээһиҥҥэ кыттыан баҕалаах актыбыыс кыргыттар, эдэр ыал ийэлэрэ олунньу 29 күнүгэр IT-Пааркаҕа кэлэн кыттыҥ диэн ыҥырабыт.
Елена ПОТОЦКАЯ, «Саха сирэ» хаһыат, edersaas.ru
Хаартыска — интэриниэттэн.