Дойду Төрүт сокуонугар уларытыыларга куоластааһын буолаары турдаҕына, СӨ Култуура уонна духуобунай сайдыы министиэристибэтэ роликтары оҥордо. Манна өрөспүүбүлүкэҕэ биллэр-көстөр дьон, тыйаатыр уонна киинэ артыыстара санааларын сахалыы уонна нууччалыы тылынан эттилэр.
«Саҥа Төрүт сокуон Арассыыйа улуу устуоруйатын көмүскүөҕэ. Сирбит-уоппут тутулуга суоҕун уонна түҥэтиллибэт аналлааҕын бөҕөргөтүөҕэ. Дойдубут, өрөспүүбүлүкэбит ураты айылҕатын харыстыыр кыахтаныа. Арассыыйаҕа олорор элбэх омук тэҥ бырааптаах буолуутун бигэргэтиэ, киһи бырааба уонна көҥүлэ күүһүрүө, — диэн артыыстар бэйэлэрин санааларын үллэстэллэр.
СӨ Култуура уонна духуобунай сайдыы миниистирэ Юрий Куприянов Төрүт Сокуоҥҥа уларытыылары киллэриигэ уопсастыбаннас болҕомтотун уурда диэн этэр. Саха сирэ Арассыыйа сорҕото буоларынан, сүрүн сокуон сахалыы тылбаастаммытын бэлиэтиир. Маныаха Арассыыйа бары норуоттарын бырааптарын араҥаччылыыры күүһүрдэри, төрөөбүт тылы-өһү, төрүт үгэһи харыстаан илдьэ сылдьыыга улахан болҕомто уурулларын ыйар. Ити барыта дьон интэриэһин тардарын этэр.
Бырайыакка култуура диэйэтэллэрэ, Саха академическай драматическай тыйаатырыттан РФ үтүөлээх, СӨ норуодунай артыыһа Анатолий Николаев, киинэ уонна драма артыыһа Иннокентий Дакаяров, СӨ үтүөлээх артыыһа Ильяна Павлова, «Снайпер саха» киинэҕэ сүрүн оруолу толорбут Дьулустаан Семенов, Хотугу төрүт олохтоох аҕыйах ахсааннаан норуоттар судаарыстыбаннай тыйаатырдарын артыыһа, СӨ култуура туйгуна Ева Кузьменко кыттыбыттар.