Маны аах Тырааныспар

Уопсастыбаннай тырааныспар тиһигин саҥардан оҥорууга сөбүлэҥ түһэрсилиннэ

СӨ Бырабыыталыстыбата, Дьокуускай куорат дьаһалтата уонна «Саха-Рэм» уопсастыбаннай тырааныспар систиэмэтин саҥардан оҥорууга үлэлэһиэхтэрэ.

Дьокуускайга уопсастыбаннай тырааныспар систиэмэтин саҥардан оҥорууга сибээһи ыкса тутан үлэлииргэ үс өрүттээх сөбүлэҥи СӨ Бырабыыталыстыбата, Дьокуускай куорат дьаһалтата уонна «Саха-Рэм» ХЭУо түһэриссибиттэрин туһунан СИА суруллар.  Дьоһун докумуоҥҥа СӨ Бырабыыталыстыбатын бэрэссэдээтэлин бастакы солбуйааччы Дмитрий Садовников, Дьокуускай куорат баһылыга Евгений Григорьев уонна «Саха-Рэм» генеральнай дириэктэрэ Денис Калков илии баттаатылар.
«Тырааныспар инфраструктуратын тупсарыы, ону сэргэ дьоҥҥо-сэргэҕэ куттала суох уонна тупсаҕай буолуутун хааччыйыы боппуруоһун СӨ Ил Дархана Айсен Николаев, бырабыыталыстыба бэрэссэдээтэлэ Андрей Тарасенко хонтуруолга туталларын сэргэ, куорат дьаһалтатыгар манан дьарыктанааччы болҕомтотугар эмиэ баар. Дьокуускайга уопсастыбаннай тырааныспар тиһигин саҥардан оҥоруу, бу өрөсүүбүлүкэ киинигэр инфраструктураны кэлимник сайыннарыыга биир сүрүн үлэнэн буолар.
Туох да саарбахтааһына суох, бу хайысха сыллата тупсан иһиэхтээх.  Маныаха партнердарбытыгар эрэнэбин«, — диир Дмитрий Садовников.
Сөбүлэһии сүрүн сыала — Дьокуускайга уопсастыбаннай тырааныспар систиэмэтин саҥардан оҥорууга өрүттэр үлэлэрин сөп түбэһиннэрии, сүрүннээһин буолар. Маны сэргэ, СӨ Ил Дархана «2032 сылга диэри Дьокуускай куораты сайыннарыы» Ыйааҕар сөп сүбэһиннэрэн туруоруллубут сыалы-соругу олоххо киллэрии көрүллэр.
Бастакынан, уопсастыбаннай тырааныспар тиһигин сайыннарыы, ол иһигэр оптуобус пааркатын кэлимник саҥардан оҥоруу, доруобуйаларыгар хааччахтаах дьоҥҥо табыгастаах буоларын курдук айан-сырыы ситимин, сибээһин тупсаран биэрии, сылаас тохтобуллары тутуу, тарыыптары көрүү, көлөнү күүтүү бириэмэтин кылгатыы уонна араспысаанньаны тутуһуу таһымын 100%-ҥа диэри үрдэтии, о.д.а. киирэллэр.
Дьокуускай куорат дьаһалтатын пресс-сулууспатын, СИА хаартыскалара туһанылыннылар.
0
0