Уопсастыбаннай тэрилтэлэр ботуччу суумалаах граннарга тиксиэхтэрэ
Бүгүн СӨ Гражданскай уопсастыба институттарын сайыннарыы миниистирэ Анатолий Бравин коммерческайа суох тэрилтэлэри өйүүргэ туһуламмыт хайысхалар тустарынан боппуруостары билиһиннэрээри өрөспүүбүлүкэ бэчээтин уорганнарын уонна интернет-таһаарыылар суруналыыстарын кытта көрүстэ.
edersaas.ru
Ааспыт сыллааҕы чахчынан өрөспүүбүлүкэҕэ регистрацияламмыт 2128 коммерческайа суох тэрилтэ баар. 2011 c. маннык уопсастыбаннай тэрилтэ ахсаана 1359 эбит.
Былырыын сүүрбэччэ коммерческайа суох тэрилтэ регистрацияламмыт. Ордук элбэх НКО көһө сылдьар аҕа ууһун общиналарын, религиознай тэрилтэлэр, араас хайысхалаах уопсастыбаннай тэрилтэлэр истэригэр тэриллэр эбит. Ол курдук, министиэристибэ пресс-сулууспата иһитиннэрэр чахчытынан арктическай улуустартан ордук элбэх НКО Өлөөн улууһугар (26), Усуйаанаҕа (22), Муомаҕа (22), Булуҥҥа (18) регистрацияламмыт. Саамай аҕыйах НКО — Дьааҥыга (11) уонна Эбээн Бытантайга (8).
— Коммерческайа суох тэрилтэри өйүүргэ туһуламмыт граннары сэттэ хайысханан үллэрдибит. Тохсунньуттан бэс ыйыгар диэри биллэриллибит куонкуруска кыттар балаһыанньаны министиэристибэ сайтыгар киирэн көрүөххэ сөп. Сүрүн болҕомто социальнай хайысхалаах баҕа өттүнэн үтүө дьыаланы оҥорор тэрилтэлэргэ ууруллуоҕа, — диэн бэлиэтээтэ миниистир Анатолий Бравин.
Биир сүрүн куонкурус Саха АССР төрүттэммитэ 100 сылыгар анаммыт бастыҥ уопсастыбаннай көҕүлээһиҥҥэ ананыаҕа. Кыайыылаахтар гражданскай сайдыы министиэристибэтин биэдэмистибэннэй наҕараадатын ылыахтара. Ону тэҥэ народнай дружиналары үлэлэтэр уопсастыбаннай тэрилтэлэр НКО-лара — 2 мөл. солк., уопсастыбаннай бэрээдэги араҥаччылааччылар бырайыактара мөлүйүөннээх гранынан бэлиэтэниэхтэрэ. НКО-лары өйүүр муниципальнай бырагыраамалар госбюджеттан 10 000 000 солк. граны ылыахтара. Улахан өйөбүл национальнай-култуурунай холбоһуктарга ууруллуоҕа — 3,5 мөл. солк.
Онон бу күннэргэ коммерческайа суох тэрилтэлэр кэскиллээх тосхоллору торумнаан, саҥа бырайыактары олоххо киллэрэр үлэни былаанныыр эппиэттээх кэмнэрэ үүннэ.
Елена ПОТОЦКАЯ, «Саха сирэ» хаһыат, edersaas.ru
Ааптар хаартыскаҕа түһэриитэ.