Коронавируһунан ыалдьар дьон ахсаана элбээбитинэн сибээстээн, алтынньы 20 күнүттэн уопсастыбаннай сирдэргэ коронавирустан быһыыны ылбыттары (сэртипикээттээхтэри) уонна ыалдьан үтүөрбүттэри эрэ киллэриэхтэрэ. Ил Дархан Айсен Николаев тустаах ыйаахха бэҕэһээ илии баттаата.
Ол курдук, алтынньы 20 күнүттэн судаарыстыба, чааһынай култуура миэстэлэригэр – тыйаатырдарга, киинэ тыйаатырдарыгар, мусуойдарга, култуура дьиэлэригэр, о.д.а. коронавирустан быһыыны ылбыты туоһулуур электроннай сэртипикээт куодунан уонна ыалдьан үтүөрбүттэри эрэ киллэриэхтэрэ.
Алтынньы 25 күнүттэн тустаах быраабыла бассейны ааҕан туран успуорт бары эбийиэктэригэр, сэтинньи 1 күнүттэн — эрэстэрээннэргэ, кафеларга, остолобуойдарга, банкетнай саалаларга. Судаарыстыбаннай уонна олохтоох толорор былаас уорганнарыгар эмиэ маннык киллэриэхтэрэ.
Сэритипикээти (атыннык эттэххэ Q-куоду) коронавирустан быһыыны ылбыт сокуоннай саастарын сиппит эбэтэр кэлиҥҥи алта ый иһигэр ыалдьыбыт дьоҥҥо биэрэллэр.
Ону тэҥэ, 6 ый анараа өттүгэр быһыыны ылбыттар эбэтэр ыалдьыбыттар хаттаан быһыыны (ревакцинация) ылаллара ирдэнэр диэн ыйыллар.
“Саха сирэ” хаһыат, edersaas.ru
Хаартыска: