Уопсастыбаннай добровольческай ыстаап Кыайыы 50 сыла спорткомплекска көстө
Ойуур баһаарын бохсууга араас хайысхалаах улахан үлэни ыытар уопсастыбаннай добровольческай ыстаап атын сиргэ көстө: сарсыҥҥыттан, атырдьах ыйын 9 күнүттэн, саҥа аадырыска — Кыайыы 50 сыла спорткомплекска, Орджоникидзе уулуссатын 28 №-гэр үлэлиэҕэ.
Бу туһунан инстаграмҥа dobroykt страницаҕа ыстаап салайааччыта, СӨ Уопсастыбаннай балаататын чилиэнэ Афанасий Алексеев иһитиннэрдэ.
Бүгүҥҥү күҥҥэ ыстаапка араас уопсастыбаннай эйгэттэн 25 актыбыыс-уопсастыбанньык үлэлиир. Киэҥ хабааннаах үлэ ыытыллар буолан, урукку Орджоникидзе 10 аадырыска баар саала кыараҕас буолан, уопсастыбанньыктарга киэҥ спортивнай саала бэрилиннэ.
Сөптөөх үлэ ыытыллар буолан, ойуур баһаарын кытта охсуһар нэһилиэктэргэ көмөлөһүөн баҕалаах үгүс. Ол үлэни уопсастыбаннай добровольческай ыстаап сүрүннүүр.
Бүгүҥҥү, атырдьах ыйын 8 күнүнээҕи, чахчынан баһаары бохсууга үлэҕэ ыстаап 212 киһини хомуйда, онтон: Горнайга — 48, Хаҥаласка — 28, Үөһээ Бүлүүгэ — 30, Намҥа — 25, Кэбээйигэ — 63, Уус Алдаҥҥа — 10, Тааттаҕа — 9 киһи үлэлиир.
Баҕалаах дьон 89148247506, 508-892, 508-893 төлөпүөннэргэ эрийэн билсиэххитин сөп.
Елена ПОТОЦКАЯ, «Саха сирэ» хаһыат.
Хаартыска — инстаграм dobroykt страницатыттан