Уопсайтан тахсарын дуу, тахсыбатын дуу устудьуон бэйэтэ быһаарыахтаах
Бэҕэһээ Арассыыйа наукаҕа уонна үрдүк үөрэххэ миниистирэ Валерий Фальков коронавируһунан сибээстээн төрдүс төгүлүн мунньахтаата итиэннэ туһааннаах министиэристибэҕэ киирэр үрдүк үөрэх тэрилтэлэрин уопсайдарын үлэтигэр сыһыаннаах бирикээскэ илии баттаата.
Кэлин, Арассыыйа атын куораттарыгар үөрэнэр устудьуоннар төрөппүттэриттэн үгүс ыйытыы киирэр буолла. “Устудьуон интэриэһин учуоттуур ирдэнэр. Дьиэлэригэр баран преподавателлэрин кытта сибээһи тутан үөрэнэр кыахтаах устудьуоннары тутумаҥ. Ол эрээри, устудьуоннар олорор уопсайдарын харантыыҥҥа сабар эмиэ наадата суох. Сорох устудьуоннар дьиэлэриттэн ыраахтар, атыттар үп-харчы өттүнэн уустуктардаах буолан эбэтэр атын төрүөтүнэн кыайан барар кыахтара суох. Уопсайга олорбот дьон киирбэттэрин курдук сабар уонна эбии сууйар-сотор ордук буолуох этэ. Температураларын киирэр ааҥҥа бэрэбиэркэлиир ирдэнэр”, — диэн миниистир эттэ.
Бирикээскэ устудьуоннар олорор уопсайдарыгар санитарнай миэрэлэри күүһүрдэр, гигиенаны тутуһар, иллэҥ бириэмэҕэ ыытыллар тэрээһиннэри тохтотор, уо.д.а. туһунан ыйыллар.
Оттон долгуйар төрөппүттэр, быһаччы оҕолоро үөрэнэр кыһаларыгар төлөпүөннээн, кураатардарыттан билсиэхтэрин сөп. Итиэннэ дойду Наукаҕа уонна үрдүк үөрэххэ миниистирэ Валерий Фальков кыттыылаах ыытыллар мунньаҕы көрүөхтэрин сөп.
Людмила ПОПОВА, edersaas.ru
Хаартыска: РФ Наукаҕа уонна үрдүк үөрэххэ министиэристибэтин саайтыттан.