Бу күннэргэ дьон сайыҥҥы уоппуската саҕаланна, оҕолор каникулга бардылар.
edersaas.ru
Онон сибээстээн атын улуустарга олохсуйан олорор дьон чугас аймахтарын көрсөн, төрөөбүт түөлбэлэригэр сынньанан, ахтылҕаннарын таһаарыахтарын баҕараллара чахчы.
Ол эрээри сыстыганнаах дьаҥ кэмигэр киин улуустарга коронавируһунан ыалдьыы түбэлтэтэ үксээбитинэн үгүс нэһилиэктэр баһылыктара уонна уопсастыбанньыктара биир дойдулаахтарыгар социальнай ситимнэр нөҥүө: «Быйыл сырыыгытын тохтотуҥ. Дьаҥ турар кэмигэр төрөөбүт нэһилиэккит дьонун-сэргэтин харыстааҥ«, — диэн ыҥырыы таһааран эрэллэр.
Бу туһунан вице-премьер Ольга Балабкина анаан холобурдаата:
— Тааттаҕа, Горнайга, Намҥа, Мэҥэ Хаҥаласка Дьокуускайтан кэлбит дьонтон сыстыганнаах дьаҥ тарҕаммыта. Онон бу сайын улуустарга барар дьон бэйэҕит доруобуйаҕыт туругун эрдэттэн бэриэбэркэлэтэн баран, кэлии-барыы боппуруоһун быһаараргыт буоллар. Улуус олохтоохторо атын сиртэн кэлэр дьонтон сэрэнэллэрэ оруннаах, — диэн бэлиэтээтэ.
Сорох улуустарга олохтоох дьокутааттар пропискалаах эрэ дьону киллэрэр-таһаарар буолбуттар диэн кэпсииллэр. Холобура, Уус Алдан Өспөҕүн дьаһалтата, дьокутааттара, эмчиттэрэ биир дойдулахтарыгар кустааһын кэмигэр «чугас дьоҥҥутун харыстааҥ, кэлэртэн туттунуҥ», — диэн ыҥырыы таһаарбыттарын өйөөн, үгүс булчут туттуммутун туһунан истибиппит.
Онон быйыл үгүс уоппускалаах дьон «олорор сирбититтэн хоҥнубат буоллубут», — диэн былааннаналлар.
Елена ПОТОЦКАЯ, «Саха сирэ» хаһыат, edersaas.ru
Хаартыска —