Үтүөҕэ үтүөнэн хардарыан, махтаныан оннугар биир эдэр киһи бүтүн инсценировка толкуйдаан, эмээхсинтэн харчытын уорбут. Ол хайдах быһыыга-майгыга буолбутуй?
СӨ ИДьМ-тын пресс-сулууспата иһитиннэрбитинэн, Нерюнгри куорат полициятын дьуһуурунай чааһыгар 70 саастаах эмээхсин эрийэн, кини дьиэтиттэн 10 тыһ. солк. харчытын уорбуттарын туһунан эппит.
Холуобунай ирдэбил оперативниктара суһал-ирдиир тэрээһиннэр кэмигэр бу уорууга уорбаланааччыны туппуттар — бу эмээхсиҥҥэ олорбут 19 саастаах уол эбит.
Барыллаан быһаарыынан, уоруу тахсыан икки нэдиэлэ иннинэ үтүө санаалаах эмээхсин олоҕор ыарахан балаһыанньаҕа сылдьар 19-таах уолу аһынан, бэйэтигэр олордо ыҥырбыт. Босхо! Арай кини сыыһата диэн — уолга кыыһа эмп ылынарыгар элбэх харчы биэрбитин туһунан астына кэпсээбитэ буолбут. Онто атын өттүнэн эргийэн тахсыбыт.
Уол сүрэх-бэлэс буолан, олох эрдэ, сарсыарда эмээхсин утуйа сыттаҕына туран, бастаан киирэр ааны, онтон харчы баар ыскаабын аанын аспыт уонна утуйан хаалбыт.
Эмээхсин туран, ааннар аһаҕастарын, харчыта сүппүтүн, эдэр дьукааҕа утуйа сытарын көрөн, аймаммыт-саймаммыт. Саҥа уһуктубут уол туох буолбутун ыйыталаһан баран, аны бэйэтин сиэптэрин хаһыспыта буолан, кини 500 солк. харчыта эмиэ сүппүтүн соһуйа кэпсээбит.
Итиэннэ хаһаайкаҕа «бэйэҥ уолуҥ ылбыта буолуо, дьиэ күлүүһэ киниэхэ эрэ баар» диэн сабаҕалаабыта буолбут.
Эмээхсин полицияҕа тыллыыр кэмигэр, уол хомунан, чугастааҕы букмекерскай хонтуораҕа барбыт. Онно тиийэн, эмээхсинтэн уорбут харчытын спортивнай ставкаларга уксан, барытын сүүйтэрэн кэбиспит. Сол күн кинини оперативниктар туппуттар.
Бу чахчынан «уоруу» ыстатыйанан холуобунай дьыала тэриллибит.
Биһиги корр., «Саха сирэ» хаһыат, edersaas.ru
Хаартыска: интэриниэттэн.