«Олохтоох каадыры — бырамыысыланнаска» диэн бырайыак чэрчитинэн 10 тыһыынча олохтоох ыччаты бырамыысыланнаска үлэлэтэ ыытыахтара. Ааспыт сыл түмүгүнэн 11 105 киһи, балартан 6 236-та ыччат саастаах дьон бырамыысыланнай тэрилтэлэргэ үлэҕэ киирбит. Бу бырайыак үлэтин устата саамай үрдүк көрдөрүү буолара бэлиэтэнэр.
Дьарыктаах буолуу судаарыстыбаннай кэмитиэт салаатын салайааччы Мария Слепцова иһитиннэрбитинэн, 2022 сылга биэс тыһыынчаттан аҕыйаҕа суох ыччаты үлэнэн хааччыйыы туһунан бырабыыталыстыба сорук туруорбут.
«Олохтоох ыччаты — бырамыысыланнаска» бырайыак 2017 сылтан үлэлиир. Бырайыак үлэтин саҕалыырыгар биэс эрэ тэрилтэ үлэлэспит эбит буоллаҕына, бүгүҥҥү күҥҥэ 43 улахан хампаанньаны уонна 28 бырамыысыланнай тэрилтэни уонна 9 тутуу тэрилтэтин, 6 тырааныспар уонна энэргиэтикэ тэрилтэтин кытта сөбүлэҥ түһэрсэн олороллор.
2017 сыллаахха 2 900 киһи үлэҕэ киирбит эбит буоллаҕына, биэс сыл түмүгүнэн 36 530 киһи үлэ миэстэтин булбут: “АЛРОСА”, “Колмар”, “Якутуголь”, тутуу тэрилтэлэрин иһигэр “Автодор”,” Адгезия”, тырааныспаар, энэргиэтикэ салаатыгар – “Якутскэнерго”, “ЛОРП”, “ЖДЯ”.
Бу бырагыраамма нөҥүө үлэҕэ киириэн баҕалаахтар дьарыктаах буолуу киинигэр тиийиэхтэрин наада. Ону сэргэ, ким эмит олорор сирин, үлэтин миэстэтин уларытыан баҕарар буоллаҕына “Переезд, переселение” диэн бырагыраама үлэлиир эбит. Бу бырагыраамма айан төлөбүрүн, биир кэмнээх харчынан көмөнү уонна айан устата хонук сир төлөбүрүн уйунар.
Айаал Петров, Нерюнгритээҕи «Колмар» тэрилтэ горномонтажнига:
— Мин Нам улууһун Маймаҕа нэһилиэгиттэн төрүттээхпин. “Навахту14” диэн бырайыагынан анал кууруска үөрэнэн баран горнопроходчигынан үлэлээбитим. Алта ый үлэлээн баран горномонтажник буоллум. Анал кууруска бу үлэлии сылдьан үрдүттэн үөрэнэбин. Бастаан Чульмаҥҥа уопсайга олорбуппут, онтон түөрт-биэс ый буолан баран туспа хос куортамнаан көспүтүм. Үлэлиир сирбит Чульмантан арыый тэйиччи баар. Бэрээдэги кытаанахтык көрөллөр, хонтуруоллууллар. Саха ыччата үлэлииригэр бары усулуобуйа баар. Манна, «Колмарга» сахалар элбээтибит.
Ульяна ЗАХАРОВА.
СИА хаартыската.