Бу уон сыл анараа өттүгэр Дьокуускай куоракка тахсыбыт өлөрүү туһунан «Саха сирэ» хаһыакка урут суруйан турабын. Онно туох буолла этэй? Ону суут уурааҕыттан билиэҕиҥ.
Суут быһаарбытынан, 2007 сыл атырдьах ыйын 25 күнүттэн алтынньы 13 күнүгэр диэри кэм иһигэр киин куорат Челюскин уулуссатыгар турар биир дьиэҕэ хаһаайын икки эр киһини уонна биир дьахтары кытта арыгылаабыттар.
Буоларын курдук, итирии-кутуруу кэмигэр дьиэлээх киһи биир ыалдьытын кытта бэрт кыраттан сылтаан бурҕачыһан турбуттар — эр киһи эрээри уһун баттахтаах сылдьарын хаһаайын үөҕээччи буолбут. Салгыы тохтуохтааҕар, аны өтүйэни ылан, бу эрэйдээҕи түөртэ төбөҕө охсон өлөрбүт.
Өлөрүүнү илэ харахтарынан көрбүт туоһулары — дьахтардаах эр киһини — ыар буруйдары оҥорон, хаста да хаайыыга олоро сылдьыбыт рецидивист дэлби куттаабыт, өлөртүөх буолан сааммыт.
Оттон өлүгү массыына багажнигар тиэйэн, ойуурга илдьэн кистээбит уонна куотар-саһар аакка барбыт.
2007 сыл алтынньы 13 күнүгэр өлүөхсүт ийэтэ полицияҕа уола сүппүтүн туһунан тыллаабыт. Ол кэмҥэ көрдөөбүттэр да булбатахтар, ол иһин сураҕа суох сүппүтүнэн ааҕыллыбыт.
2008 сыл сайыныгар тыаҕа сынньана тахсыбыт дьон сытыйбыт өлүгү булан, полицияҕа биллэрбиттэр. Экспертиза быһаарбытынан, өлүк ол сураҕа суох сүппүт киһи буолара биллибит.
Оттон уорбаланааччы уһун сылларга уорганнартан саһа сылдьыбытын, оперативниктар ханна баарын син биир булан туппуттар. Сотору кэминэн ыар буруй туоһулара эмиэ булуллан доппуруостаммыттар.
Суут уурааҕынан, өлөрүөхсүт 9 сылга кытаанах эрэсиимнээх холуонньаҕа көҥүлэ быһылынна.
Бу туһунан РФ Силиэстийэлиир кэмитиэтин Саха сиринээҕи управлениета иһитиннэрдэ.
Вера МАКАРОВА, «Саха сирэ» хаһыат, edersaas.ru
Хаартыска: интэриниэттэн.