Доруобуйа Маны аах

Уон биир улууска быһыыны ылыы көрдөрүүтэ намыһах

Ил Дархан Айсен Николаев суһал ыстаап бүгүҥҥү мунньаҕар күнтэн күн короновируһунан күүскэ ыалдьыбыт дьон ахсаана эбиллэ турарын бэлиэтээн туран, улуустарга быһыыны ылыыны хонтуруолга ылыахха наадатын эттэ.

Айсн Сергеевич бэлиэтииринэн, билигин 11 улууска балаһыанньа уустук. Ол курдук, Алдаҥҥа, Аммаҕа, Булуҥҥа, Үөһээ Бүлүүгэ, Намҥа, Нерюнгригэ, Өймөкөөҥҥө, Сунтаарга, Тааттаҕа, Уус Алдаҥҥа уонна Чурапчыга быһыыны ылыы былаана 50 %-тан намыһах.

“Өрөспүүбүлүкэ үрдүнэн быһыыны ылыы көрдөрүүтэ куһаҕана суох эрээри, сорох улуустар былаантан хаалан иһэллэр. Ити улуустарга дьаҥ-дьаһах күүскэ турар. Ханна дьон-сэргэ быһыыны түргэнник ылар да, онно ыалдьыбыт киһи ахсаана түһэн иһэр. Холобур, хотугу улуустарга”, – диэн бэлиэтиир Айсен Сергеевич.

Оперативнай ыстаап иһитиннэрэринэн, күннэтэ 100-чэкэ киһи короновируһунан ыалдьар. Билиҥҥи туругунан, 75 киһи ыарахан туруктаах, ол иһигэр 19 киһи анал аппаратынан тыынар.

Айсен Николаев мунньах кэмигэр кэлбит вакциналары үөһээ ааттаммыт улуустар ситэ туһана иликтэрин, киин сиртэн ыраах сытар суола-ииһэ суох нэһилиэнньэлээх пууннарга вакциналары кэмигэр тириэрдэр наадатын этэн туран, 90 % быһыыны ылбыт улуустарга судаарыстыба өттүттэн көҕүлээһин баар буолуохтааҕын иһитиннэрдэ.

Аграфена КУЗЬМИНА, “Саха сирэ” хаһыат.

0
0