Таатта улууһугар, Уолбаҕа, үөрүүлээх күн буолла. Саҥа дьиэ күлүүһүн туттарыы долгутуулаах түгэнигэр алгыс баһа сыаланна, үтүө тыллар этилиннилэр. Бу туһунан улуустааҕы култуура уонна духуобунай сайдыы управлениетын салайар Гаврил Вырдылинтан, нэһилиэк кулуубун дириэктэрэ Анастасия Боппосоваттан ыйыталастым.
«Сахам сирэ — 21 үйэҕэ» өрөспүүбүлүкэтээҕи үтүө дьыала хамсааһынын чэрчитинэн нэһилиэккэ аан бастаан толору хааччыллыылаах, түөрт кыбартыыралаах дьиэ дьэндэтиллибит. Күүтүүлээх алаһа дьиэ эдэр исписэлиистэргэ ананан тутуллубут. Хаһаайыттарга күлүүһү туттарыы, саҥа дьиэни көрүү-истии үөрүүтүгэр нэһилиэк олохтоохторо, Таатта улууһун баһылыга М.Соров, улуус баһылыгын тутуу боппуруоһугар солбуйааччы А.Потапов, баһылык көмөлөһөөччүтэ И.Татаринов, Уолба нэһилиэгин баһылыга В.Рахлеев уо.д.а. кыттыбыттар.
—Тэрээһини нэһилиэк бочуоттаах олохтооҕо Ю.Неустроев аал уоту оттон айах тутан саҥа дьиэни арчылааһынынан саҕалаата. Саҥа дьиэҕэ киирии бэлиэтигэр аалай кыһыл лиэнтэни быстылар. Эдэр ыалларга: Аржаковтарга, Баишевтарга, Беляевтарга уонна В.И.Дьяконоваҕа ытыс тыаһыгар арыаллатан күлүүстэри туттартаатылар. Эҕэрдэ эриэккэһэ, баҕа санаа бастыҥа этилиннэ. Бэдэрээччиттэргэ: «Тулааһын» (А.Иванов), «ТехноСтройИнвест» (Н.Федотов) ХЭУо дьон-сэргэ махталын тиэртэ, — диэн кэпсээтилэр.
Уолбалар тыа сиригэр аныгы үйэҕэ эппиэттиир толору хааччыллыылаах дьиэлэр тутулла туралларыгар баҕарбыттар.
Биһиги корр., “Саха сирэ” хаһыат, edersaas.ru