Улуу Кыайыы 75 сылыгар аналлаах устуоруйаҕа киирэр улахан параакка, Саха сириттэн сулууспалыы сылдьар уолаттар кыттыбыттарын истэн олус үөрэбит, кинилэринэн киэн туттабыт.
Бүгүн Ростов-на-Дону куоракка Улуу Кыайыы 75 сылыгар аналлаах параакка Нам улууһун Аппааны уола кытынна диэн үөрүүлээх сонун тиийэн кэллэ.
—Кирилл Егоров И.Е.Винокуров аатынан Хатыҥ Арыы орто оскуолатын былырыын бүтэрбитэ. Оҕо эрдэҕиттэн үөрэххэ, үлэҕэ олус тардыһыылаах, көхтөөх уол. Оскуолатын, нэһилиэгин, улууһун чиэһин элбэхтэ араас күрэстэргэ, олимпиадаларга чиэстээхтик көмүскээбитэ. Ситиһиитэ элбэх. Анапаҕа «Смена», Владивостокка «Океан» лааҕырдарга сынньаммыта. Оскуолатын бүтэрээт, ХИФУ норуоттар тылларын, култуураларын институтугар, ыччаты кытары үлэлиир исписэлиис буолар баҕалаах үөрэххэ киирбитэ. Бастакы семестрин түмүктээт, бэйэтин баҕатынан ытык иэһин төлүү аармыйаҕа барбыта.
Аармыйаҕа Владивостокка боцмаҥҥа үөрэммитэ уонна эксээмэннэрин ситиһиилээхтик туттаран, Севастопольга Черноморскай флотка сулууспалыыр. «Цезарь Куников» улахан десантнай хараабыл хамаандатыгар киирэн, ыраах айаннарга устар чиэскэ тиксэн сылдьар. Оттон бу, үс нэдиэлэлээх кытаанах бэлэмнэнии кэнниттэн, Черноморскай флот састаабыгар киирэн, Ростов-на-Дону куоракка Улуу Кыайыы 75 сыллаах параадыгар кытынна. Биһиги онтон наһаа үөрэбит, уолбутунан киэн туттабыт, — диэн иһитиннэрэллэр биир дойдулаахтара.