Мэҥэ Хаҥаласка В.К. Степанов аатынан култуура уонна спорт эстафетата саҕаланна. Олунньу 4 күнүгэр Аллараа Бэстээхтээҕи Тырааныспар техникумун спорт саалатыгар 61-с сылын ыытыллар тэрээһин бастакы түһүмэҕэр ‒ фитнес-аэробикаҕа күрэстэһиигэ Хара нэһилиэгин уолаттара туспа хамаанданан кыттан көрөөччүлэр биһирэбиллэрин ыллылар.
Күрэхтэһии үөрүүлээх аһыллыытыгар дьүүллүүр сүбэ бэрэссэдээтэлэ, М.К.Аммосов аатынан ХИФУ физкултуураҕа институтун фитнескэ уһуйааччыта, СӨ фитнес‒аэробикаҕа федерациятын толорооччу дириэктэрэ Лилия Дмитриева Мэҥэ Хаҥалас дьоно-сэргэтэ спорду, фитнес-аэробика курдук чэпчэкитэ суох көрүҥү өйүүллэрин, көҕүлүүллэрин иһин махталын эттэ. Улуустааҕы култуура уонна духуобунай сайдыы управлениетын исписэлииһэ Эмма Павлова урукку сылларга фитнес-аэробикаҕа күрэстэһии нэһилиэктэринэн ыытыллар этэ, быйыл кыттааччылар бэйэ-бэйэлэриттэн уопут атастастыннар, үөрэнниннэр диэн барыларын биир түһүлгэҕэ мустубут диэн иһитиннэрдэ.
Күрэхтэһиигэ 31 нэһилиэктэн 43 хамаандаттан 300-тэн тахса киһи кытынна. Хара нэһилиэгин эдэр уолаттара көхтөөхтөрүн көрдөрөннөр, фитнескэ эр дьон хамаандатын туруорбуттара, хас да нэһилиэк эдэрдэргэ уонна саастаахтарга туһунан хамаанданан кыттыбыта кэрэхсэннэ. Бары кыттааччылары ыалдьааччылар уруйдаан-айхаллаан көрсүбүттэрэ күрэхтэһиини сырдык тыыннаата.
Дьүүллүүр сүбэҕэ фитнес-аэробикаҕа быһаччы сыһыаннаах исписэлиистэр Дьокуускайтан ыҥырыллан кэлэн, хас биирдии нүөмэри ымпыгар-чымпыгар диэри ырытан сыаналаатылар.
Майа сэлиэнньэтин тэрилтэлэрин ортотугар бастакы миэстэни Ф.Г.Охлопков аатынан Майа орто оскуолатын хамаандата ылла. В.П.Ларионов аатынан орто оскуола уонна «Мичил» оҕо уһуйаанын сүүмэрдэммит хамаандалара иккис, үһүс миэстэлэри үллэһиннилэр.
Нэһилиэктэргэ маҥнайгы бөлөххө төхтүрдэр бастакы, төҥүлүлэр иккис, павловскайдар үһүс миэстэни ыллылар. Иккис бөлөххө Хорообут, Хара, Мэҥэ нэһилиэктэрэ таҕыстылар. Үһүс бөлөххө Томтор, Бырама, Моорук ыччаттара миэстэлэстилэр. Маны сэргэ, 35-тэн үөһэ саастаахтарга сэттэ хамаанда кыттыбытыттан Дьаҥхаады, Аллараа Бэстээх уонна Мэлдьэхси нэһилиэгин хамаандалара бастыҥ аатын сүктүлэр.
Виктория БЕЛОЛЮБСКАЯ.