Тарбахтарыгар талааннаах, уус дьон билигин тугу-тугу оҥорон бар дьоннорун сөхтөрбөтөхтөрө баарай?! Кинилэр хатыласпат ураты оҥоһуктарын өрөспүүбүлүкэ, Арассыыйа, аан дойду дьоно-сэргэтэ көрөн хайгыыр.
Нам улууһун Модут олохтооҕо, эдэр ыал аҕата Никита Захаров ноһуомунан чочуйан таһаарбыт сибилигин аҕай тобурах хаарынан чэпчэкитик сүүрэн тэлээрэ туруох айылаах кырасыабай табата ватсаабынан тута киэҥник тарҕаммыта. Ыта бу тиийэн кэлиэх курдуга сөхтөрбүтэ.
—Мин тутуунан дьарыктанабын. Үлэбит сааскыттан саҕалаан күһүҥҥэ диэри элбэх буолар. Кыһын арыый холкутуйабыт, бириэмэлэнэбит. Ол иһин, Дьокуускайга ыытыллыбыт хаартан, муустан оҥоһуктарга норуоттар икки ардыларынааҕы фестивалларыгар табаарыспынаан, Тимофей Поповтуун, үөрэнэ, атыттары көрө таарыйа кыттан турабыт. Улуу суруйааччы Былатыан Ойуунускай төрөөбүтэ 125 сылынан, хаарынан “Оҕо куйуурдуу турара” композицияны оҥорбуппут. Муустан “Байанай” композицияны чочуйан таһаарбыппыт, — диэн саҕалыыр Никита.
—Михаил Боппосов, Анатолий Филиппов оҥоһууларын көрөн сэҥээрэн бөҕө. Оҥорор матырыйааллара да хаһаайыстыбалах дьоҥҥо баар. Хантан да атыылаһа сатаабаккын. Оччотугар, биһиги эмиэ сүөһү-ас иитэр буолан бараммыт, тоҕо холонон көрбөппүтүй? Тугу эмэ оҥорон оҕону-урууну үөрдүөххэ буоллаҕа диэн санааттан боруобалаан оҥорбутум.
Бастаан табаны чочуйбутум. Мас лаппаакынан сыбаан үс-түөрт күнүнэн бүтэрбитим. Иһин, сиһин оҥорууттан саҕалаабытым. Онтон атахтарыгар сонос соҕус талахтары анньыталаан баран, аны, онтубун сыыйа сыбаан таһаарбытым. Муоһа – боробулуоха. Үчүгэйдик токуруйар, киһи хайа баҕарар тутар буолан, табыгастаах. Ноһуому убатан, муоспун онно уган ыла-ыла тоҥорон, сыыйа сонотон быһыытын биэрбитим уонна хоруона курдук табам төбөтүгэр кэтэрдэн баран эмиэ сыбаан кэбиспитим. Ол кэнниттэн миинэн баран дьиибэлэнэн, “Уол тыалаата” диэн суруктаабытым уонна табаарыспар ватсабынан ыытан кэбиспитим. Табаарыһым ону көрөн билэр дьонугар ыыталаабыта түргэн баҕайытык тарҕанан хаалбыт этэ. Соһуйбутум аҕай.
Бу хаартысканы көрөөт, Никитаҕа хаһыаттан эрийбиттэр, “Саха” НКИХ тахсан устубут. Соҕуруу куораттан эрийэн көрдөөбүттэр эрээри, бырааһынньыктааҕы түбүктэн мэһэйдэтэн, кыайан кэпсэппэтэхтэр. Аны дойдулаахтара даҕаны, телевидение үлэһиттэрэ даҕаны тута “Ытта оҥор” диэн турбуттар.
—Саҥа дьыл бырааһынньыга адьас субу ыган кэлбитэ. Мин буоллаҕына сөбүлэһэн кэбиһэн бараммын, хайдах да аккаастыыр кыаҕым суоҕа. Онон бырааттарым булчут ыттарын көрө-көрөбүн үс күнүнэн сыбаан бүтэрбитим. Икки салааска ноһуом киирбитэ. Үүт бөлөнөҕүн маҥхатарга туттубутум. Хордуоҥканан тыл оҥорон биэрбитим. Түүтүн, өҥүн кылабачытан инчэппитим.
Оҥоһуктарбын Саҥа дьыл бырааһынньыгын саҕана, олохтоох дьаһалтабыт таһырдьа харыйа таһыгар аҕалан туруортуоҥ дуо диэннэр, табаарыспынаан тыраахтарынан тиэйэн илдьибиппит. Дьоннор хаартыскаҕа түспүттэр этэ.
Бу үүнэр сылга үлэх номнуо киирбитэ. Сорохтор тугу оҥорорбун ыйыталлар, кэтэһэллэр. Онон дьонум-сэргэм көрөллөрүгэр анаан, дьиэҕэ иитиллэр сибиинньэни буолбакка, кабааны оҥоруохпун баҕарабын. Түөрт күнүнэн сыбаан бүтэриэм дии саныыбын, — диэтэ Никита.
Манна даҕатан эттэххэ, билигин эдэр дьон үксэ сүөһүнү тута сатаабат. Оттон бу Никиталаах хаһаайыстыбалаах эрэ киһи аныгы үйэҕэ сибиэһэй, иҥэмтиэлээх аһынан аһыырын бэлиэтииллэр. “Билигин сүөһүлээх-астаах эрэ буоллаххына бэйэҕин көрүнэҕин” , — диир дьиэ хаһаайына.
Илиилэригэр дьоҕурдаах, тарбахтарыгар талааннаах маастардарбыт Саҥа дьылга сонун, кэрэ оҥоһуктарын бар дьон долгуйа, эрэнэ кэтэһэр.
Сардаана БАСНАЕВА, “Саха сирэ” хаһыат, edersaas.ru