Мин 1968 сыллаахха бэһис кылаас оҕолорун Лариса Кондратьевна Кириллинаттан туппутум. Базовай оскуола оҕолоро эбиллибиттэрэ.
25 оҕону ахсыс кылааска диэри түөрт сыл салайбыттаахпын. Элбэх көрсүһүүлэри, куруһуоктары, походтары, секциялары тэрийэрбит. Сүүрэр-көтөр сирбит: «Чооруос өтөҕө», «Иик алааһа», «Сааба хонуута» буолара.
Оҕолорум барыга бары көмөлөһөн, илэ-сала түһэллэрэ. Уочарытынан чиэппэрдэр аайы дуоһунас
анаталыырым: ытаарыста, казначей, спортсектор, санитар, сибэкки көрөөччү, баһаатай, кэрэспэдьиэн,
култуура боппуруоһугар эппиэттээх, эрэдээктэр, столяр, худуоһунньук. Бу кылаас оҕолоруттан Павлов Саша наар спортка эппиэттээх буолааччы. Кини дьаһайыытынан байыаннай оонньуулары ыытарбыт. Бэстээх оскуола оҕолорун кытта күрэхтэһэрбит. Субуотаҕа 2 чаастан киэһэ 8-9 чааска диэри сылдьарбыт. Дьиэбитигэр сатыы кэлээччибит. Сороҕор, Сашабыт аҕата, Павлов Кирилл Егорович массынанан кэлэн ылан барааччы. Хата мөхпөт этэ. Биһиги хаалан баран аспыт ордугун мотуйан, дьиэбитин үөрэ-көтө буларбыт.
Мин хотунум, Татьяна Николаевна тунгууска хааннааҕа, миэхэ олус сымнаҕастык сыһыаннаһара. Кэргэним Иван Александрович хаһан да сэмэлээбэт этэ. Ити курдук, 46 сыл ыал буолан, оҕо төрөтөн, сиэн көрөн, тапталлаах куораппытыгар үлэлээн-хамсаан олорбуппут. Онон дьонум барахсаттары ахтан-санаан ааһарым бааламмата буолуо. Кинилэр үчүгэй сыһыаннаах буоланнар, баччаҕа тиийэн кэллэҕим.
Кылааһым иирбэ-таарба үлэтигэр төрөппүттэрим барахсаттар көмөлөрө улахан этэ. Ол курдук: Корякин Иван Петрович – ДОСААФ үлэһитэ, Варвариков Гаврил Алексеевич – милииссийэ үлэһитэ, Павлов Кирилл Егорович – райсовет бэрэссэдээтэлэ, Григорьева Анна Иннокентьевна – оскуолам завуһа, Афанасьева Татьяна Константиновна – ГОРПО буҕаалтыра, Таскина Христина Федотовна – хомусчут, тойуксут, оһуохайдьыт, Руфов Михаил Васильевич – үлэ уруогун учуутала.
Кылааһым оҕолоро эмиэ сүрдээҕин көмөлөһөр этилэр: Корякина Лина, Докторова Ира, Варварикова Аня, Егорова Марина, Каратаева Света, Руфов Толя, Павлов Саша, Волков Петя, Григорьев Саша, Афанасьев Саша, Тимофеев Эдик, Михайлова Ага. Элбэхтик күһүн, саас, айылҕа уларыйар, маанымсыйар, тубарсыйар кэмнэригэр походтуур идэлээх этибит. Биирдэ күһүн боротуоха кытыытыгар турар тиит маска хаалтыс баайбыппыт уонна 2000 сылга сурук суруйаммыт бытыылкаҕа уган сургуустаан баран, мас төрдүгэр көмөн турардаахпыт. Сурукпутугар куоракка хас оскуола, уулусса, ханнык тэрилтэ, төһө киһи олороро, хас ыал массыыналааҕа, салайааччылара кимнээхтэрэ суруллан турардаах. Ону оҕолор 2000 сылы санаан, мустан мастарын көрдөөн баран булбатахтар. Оччолорго халыҥ хаар, халаан уута маспытын түөрэ охсон Эбэҕэ илдьэ бардаҕа. Ону ахтан, оҕолор билигин да саныы сылдьаахтыыллар эбит.
1973 сыллаахха оскуолабытыгар физмат кылаас арыллыбыта. Ону тэрийээччилэринэн: дириэктэр Иванов Иван Александрович, завучтар: Григорьева Анна Иннокентьевна, Тимофеева Екатерина Харлампьевна этилэр. Онон мин кылааһым талыллан, атын ахсыс кылаастартан хомуллан дириҥ билиини ылан үөрэммиттэрэ. Онон мин кылааһым «Б» диэн буолан, онуһу ситиһиилээхтик бүтэрбиттэрэ. Билигин араас үрдүк үөрэхтээх үлэһит ыал маанылаах эбээлэрэ, эһээлэрэ буолан олороллоруттан астынабын, үөрэбин. Мин кылааһым оҕото, үөрэнээччим Павлов Саша билигин аан дойдуга биллэр сэргэ туруорааччы, сахалар өбүгэбит үгэһин тыыннаан аан дойдуга тарҕатааччы, туспа көрүүлээх-истиилээх, илиитигэр дьоҕурдаах буолан, саха омук баарын киэн эйгэҕэ биллэрэ сылдьар. Кини үлэлэрин Монголияҕа, Турцияҕа, Казахстаҥҥа, Австрияҕа, Америкаҕа, Грецияҕа, Исландияҕа, Сербияҕа, Киргизияҕа, Арассыыйа араас куораттарыгар Саха сиригэр улаханнык биһирээтилэр.
Александр Павлов сахалыы иитиилээх үөрэммит уонна төрөппүттэрин такайыытынан саха норуота үйэлэргэ муспут баай үгэстэригэр иитиллэн, тугу барытын сахалыы толкуйдуур, үрдүктүк сыаналыыр тыыҥҥа тыыҥҥа иитиллибит-улааппыт, төрөппүттэрин сабыдыаллара күүстээҕин сөҕө көрөҕүн. Ону тэнэ Александр Кириллович кэргэнэ, Галина Николаевна сылаас сыһыана, сүбэтэ кинини үлэтигэр ситиһиигэ, үрдүк аакка тириэртэҕэ. Дьиэ кэргэн сыһыаныттан олоҕун оҥкула уҕараабат күүстэнэрин бары да билэн эрдэхпит.
Александр Кириллович бииргэ үөрэммит оҕолорун бииргэ кытта кэлэн сэмэйдик сэргэ туруоран бардылар. Хамсык хаайбатаҕа буоллар, көрсүһүүлэр да буолуохтарын сөп этэ.
Быйыл 10 «Б» кылаастар оскуоланы бутэрбиттэрэ 45 сылын туолла. Сэргэни Александр Кириллович Руфов Толятынаан көмөлөөн 3 күн иһигэр туоруора оҕустулар. Алгыһы Аня Варварикова оҥордо, кырааскатын Анастасия Руфова дьаһайда. Үлэ хайдах барыахтаах былаанын кылаас ыстаарыстата Галина Борисовна Петрова оҥорбут. Сэргэни тиит мастан 4 салаалаан, үрүҥ сылгы сиэлинэн саламалаан, үрдүгэр чороонноон туруорбуттара көрүөххэ кэрэ.
Кыттыбыт оҕолорум ааттарын оскуолатааҕы испииһэктэринэн санаан суруйдум, баалаамаҥ! Руфов Толя – столяр, газ автомеханига, Николаев Саша – столяр, Дьокуускай Намыгар олорор, Варвариков Аня – СӨ үтүөлээх юриһа, юстиция полковнига, Дьокуускай. Слепцова Ирена – 28 №-дээх оскуола дириэктэрэ, Дьокуускай, РФ уопсай үөрэҕириитин бочуоттаах үлэһитэ, СӨ үөрэҕирии туйгуна. Петрова Галина – товаровед-продавец, кылаас ыстаарыстата, элбэх грамоталардаах. Наташа Никифорова — нолуок сулууспатын үлэһитэ, суһал хонтуруол отделын иккис разрядтаах исписэлииһэ, Николаев Валерий – быткомбинат инженер-технигэ, Павлов Александр – “Киэргэ” ювелирнай фирма генеральнай дириэктэрэ. Майоровская Рита – товаровед, Ньурба.Унаров Платон – СХТ үлэһитэ, таксист.
Ханнык баҕарар киһиэхэ, үүнээйигэ, харамайга сырдык наада. Күн сырдыга, халлаан сырдыга, тулалыыр эйгэ сырдыга. Киһи киһиэхэ сыһыанын сырдыга. Оҕолорбут сырдык санаалаах буолан, үөрэммит кэмнэрин санаан, сэргэ туруоран барбыттара биһиэхэ, кырдьаҕастарга, үлэлээбит дьоҥҥо сырдыгы сахтахтара.
Уол оҕо одьунааһа Павлов Александр Кириллович хаһыаттарга, сурунаалларга, телевизорга элбэхтик тахсыталаабытын көрөн бүлүүлэр үөрэн, сүөм саҕа үрдээтибит.
2019с. Кирилл Егорович Павлов оҕотугар, Павлов Сашаҕа анаан үйэлээх «Саха үтүөкэн дьоно» диэн сериянан үчүгэйкээн кинигэни таһаарда. Онно ахтыылар, дьон махтала, хайҕала, кини үлэтэ барыта түмүллүбүт, 202 сирэйдээх, элбэх хаартыскалар киллэриллибиттэр. Саха киһитин үгэһинэн, өбүгэлэр этэллэринэн, олох салҕанан барар. Оҕолоргут-сиэннэргит, дьоҥҥут-сэргэҕит туһугар өссө да айа-тута, өрүү сырдыы, сыдьаайа сылдьыҥ. Кыаммат-түгэммэт дьоҥҥо көмөлөһөр аналы умнумаҥ! Доруобай, дьоллоох буолуҥ! Күн сиригэр баар күндү эһиэхэ тосхойо сырыттын!
Бүлүү к.1 №-дээх оскуолатыгар 1968-1975 сс. үөрэппит, кылаас салайааччытынан үлэлээбит учууталгыт Павлина Даниловна Иванова. РФ үөрэҕириитин туйгуна, СӨ үтүөлээх учуутала.
Бүлүү