Арассыыйа уонна Кытай техническэй университеттарын ассоциациятын I форума
Бүгүҥҥүттэн Арктиканы чинчийиигэ Арассыыйа уонна Кытай техническэй университеттарын ассоциациятын I форума саҕаланна. Тэрээһин арыллыытыгар СӨ Ил Дарханын эбээһинэһин толорооччу Айсен Николаев кытынна.
edersaas.ru Өрөспүүбүлүкэ салайааччыта маннык көрсүһүүлэр Арассыыйа уонна Кытай икки өттүттэн аһаҕас сыһыаннаһыыларыгар үтэйэр күүһүнэн буоларын бэлиэтээтэ. Владивостокка ыытыллыбыт Илиҥҥи экономическай форум бу икки дойду саҥа сыһыаҥҥа тахсан эрэллэрин өссө төгүл туоһулуурун эттэ. Эрэгийиэҥҥэ экэниэмикэ саҥа халыыба олохтонон эрэрин, маныаха Саха сирэ Уһук Илин уокурукка эрэ буолбакка, Арассыыйаҕа эмиэ тэтиминэн уонна хаачыстыбанан баһырхай сыалы туруорарын тоһоҕолоон эттэ. Оттон форум төһө даҕаны икки күн устата ыытылыннар, былаана киэҥ. Ол курдук, хотугу сир уратытын, ирбэт тоҥун, ураты айылҕатын учуоттаан, тутуу саҥа матырыйаалын оҥоруу, итиниэхэ саҥа технологияны туһаныы буолар. Ону тэҥэ, суол оҥоһуутун сайдыытын боппуруоһун көрүөхтэрэ. СӨ үөрэҕин уонна наукатын миниистирин солбуйааччы Михаил Присяжнай: “Маннык форум Саха сиригэр аан маҥнайгытын ыытыллар. Тоҕо Саха сиригэр? Тоҕо диэтэххэ, барыта территория физико-географическай усулуобуйатыттан, айылҕа, климат, экология уларыйыытыттан тутулуктаах. Оттон ассоциация сүнньүнэн тымныы, ирбэт тоҥноох климат усулуобуйатыгар тутуу ыытар, оҥорон таһаарар хайысхалаах. Уонна үрдүк үөрэх кыһалара техническэй боппуруостары быһаарар эрэ соруктаах буолбатахтар, ону таһынан каадыры бэлэмниир соруктаахтар. Инньэ гынан, үөрэх кыттыгас бырагыраамаларын, устудьуоннар хардарыта үлэҕэ холонон көрөр быраактыкаларын (стажировка) уонна, биллэн турар, научнай чинчийии барыйааннарын кэпсэтэллэр”, — диэн билиһиннэрдэ. Манна тутуу эрэ буолбакка, суол-иис боппуруоһа эмиэ хабыллар. Форумҥа Арассыыйа уонна Кытай 30-ча техническэй университеттарын бэрэстэбиитэллэрэ кытталлар. Сүрүн мунньаҕы таһынан, секциянан үлэлииллэр, эдэр учуонайдар бааһыналары көрөллөр-истэллэр. Форум икки күн устата тилэри барыаҕа. Ол түмүгэр бииргэ үлэлэһиигэ кэккэ сөбүлэһиилэргэ илии баттаһыахтара.
Людмила ПОПОВА, “Саха сирэ” хаһыат, edersaas.ru
Артемий ГРОШЕВ (СИА) хаартыскаҕа түһэриилэрэ.