Бу күннэргэ Хотугулуу-Илиҥҥи федеральнай университет Инфраструктурнай технологияларга кэллиэһигэр үөрүүлээх быһыыга-майгыга спортивнай саала аһылынна. ХИФУ тустаах кэллиэһин дириэктэрэ Алексей Бессмертнэй бэлиэ тэрээһин кэллиэс тэриллибитэ 50 сылыгар сөп түбэстэ диэн этэр.
“Устудьуон 40 % уопсайга олорор. Биһиги сыалбыт – кинилэр спордунан дьарыктаналларын көҕүлээһин, эдэрдэр күүстэрин сөптөөх суолга салайыы. Биһиги кэллиэспит быйыл тэриллибитэ 50 сылын туолар. Спортивнай саала үбүлүөйдээх сыл иитинэн үлэҕэ киирдэ. Кэллиэгэлэрбэр, устудьуоннарга махталбын биллэрэбин. Биһиги эмиэ бэйэбит кылааппытын киллэристибит. Ордук устудьуоннары кытта чаҕылхай үлэни оҥорбут устукатууркалыыр-бүрүйэр (штукатурно-облицовочнай) үлэ мастарыскыайын сэбиэдиссэйэ Татьяна Алексееваны уонна тааһы кытта үлэлэргэ мастарыскыай сэбиэдиссэйэ Галина Скоробогатованы бэлиэтиэхпин баҕарабын”, — диэн Алексей Бессмертнэй санаатын үллэстэр.
“ХИФУ орто анал үөрэҕэ бэйэтэ туспа хамаанданан кыттыаҕа. Өрөспүүбүлүкэ чөмпүйэнээттэригэр кытталларын курдук, эрэсэрээттээх устудьуоннары хомуйталыахпыт”, — диэн Арассыыйатааҕы устудьуоннар спортивнай сойуустарын Саха сиринээҕи салаатын толорооччу дириэктэрэ Роман Оконешников бэлиэтээтэ.
“Кэллиэс уонна Технологическай институт устудьуоннара үөрэхтэригэр ситиһиилэрин уонна спорка көхтөөхтүк кытталларын бэлиэтиир оруннаах. Кинилэр спортивнай саалаҕа өрүү үөрүүнэн кэлэллэр”, — диэн кэллиэгэлэрин эҕэрдэлии кэлбит ХИФУ физкултуураҕа-спорка кулуубун салайааччыта Прокопий Андросов этэр. Билигин устудьуоннар кэллиэс спортивнай ситиһиилэрин чөлүгэр түһэрэр уонна ХИФУ уопсай мэтээллэригэр бэйэлэрин кылааттарын киллэрсэллэрэ эрэ хаалла диир.
Майя АКИМОВА, ХИФУ пресс-сулууспата.