Маны аах Уопсастыба Эдэр саас

Умсуура бастакы альбомун таһаарда

«Эстрада тыйаатырын» ырыаһыта Умсуура «Күһүн» диэн бастакы альбомун таһаарда. Альбомҥа барыта 12 ырыа киирдэ.

Альбомугар киирбит ырыалары  интэриниэттэн  хачайдаан истиэххэ сөп.

Умсуураттан бастакы ырыа-альбомун таһаарбытынан эҕэрдэлээн туран, альбомун туһунан, айар киэһэтин оҥорор былааннарын туһунан бэйэтин санаатын үллэстэригэр көрдөстүбүт:

«Альбомҥа араас кэмҥэ ыллаабыт ырыаларым киирдилэр. Урукку өттүгэр толорбут убайым Семен Ченянов суруйбут ырыаларын саҥардан, тупсаран биэрдибит. Ону таһынан Герасим Павлов-Дьарааһын, Аскалон Павлов, Өркөн, Лэгэнтэй ырыалара уонна бэйэм үс ырыам баар. Дьиҥинэн, айар киэһэбин былырыын оҥоруохпун баҕарбытым. Ону пандемия мэһэйдээн кэбиспитэ. Бу хааччах кыратык намыраатаҕына, эһиил эбэтэр онтон кэлэр сылга буолуо«, -диир Умсуура.

Умсуура бастакы ырыаларыттан биирдэстэрэ «Ардах анныгар»

«Умсуура «Тохтоомо, музыкам тохтоомо» диэн ырыатыгар былырыын килиип тахсыбыта. Лариса Попова-Көҥүл Кыыс тылларыгар, Герасим Павлов-Дьарааһын матыыбыгар «Тохтоомо, музыкам тохтоомо» ырыаны Владислав Петров-Wilyami аранжировкалаан киэргэтэн, ситэрэн биэрбит. Килиип Иван Федоров уонна Алексей Семенов идиэйэлэринэн уһуллубут. Режиссерунан Константин Тимофеев- CUOSTA, операторынан Тим Третьяков үлэлээн килииби сүрэхтээбиттэр.

Умсуура саҥа альбомуттан «Хара харахтар» ырыаны истиҥ.

edersaas.ru

0
0