Бу күннэргэ Саха АССР 100 сылынан өрөспүүбүлүкэ оскуолаларыгар оҕолорго билиини-көрүүнү биэрэргэ бэртээхэй сонун уруоктар ыытылыннылар.
СӨ Бырабыыталыстыбатын Бэрэссэдээтэлин солбуйааччы Ольга Балабкина Дьокуускайга Н.Алексеева аатынан тэхиньиичэскэй лиссиэй 11 кылааһын үөрэнээччилэригэр ыалдьыттаата. Уруок Арассыыйа уонна Саха Өрөспүүбүлүкэтин өрөгөй ырыаларын толорууттан саҕаланна. Ольга Валерьевна Саха АССР төрүттэниитин, оччотооҕу кэми, өрөспүүбүлүкэ сайдыытын, сатабыллаах салайааччыларын туһунан кэпсээтэ.
Салгыы оҕолор элбэх ыйытыыны биэрдилэр. Устуоруйаттан саҕалаан аныгы үйэ тутууларыгар, култуура эбийиэктрин чөлүгэр түһэриигэ, куорат уулуссаларын, нэһилиэнньэлээх пууннары тупсаран оҥоруу туһунан, о.д.а. токкоолостулар.
«Оҕолор көхтөөхтөрө, сэргэхтэрэ уонна билэргэ-көрөргө дьулуһаллара үөрдэр«, — диэтэ Ольга Балабкина уонна кинилэргэ оскуолаларын үчүгэй сыаналарынан бүтэрэллэригэр, сөбүлүүр идэлэрин талалларыгар, дойдуларыгар бэриниилээх үлэһит буолалларыгар баҕарда.