Маны аах Уопсастыба

«Умнас» суолга өрөмүөн түмүктэнэн эрэр

Хаҥалас оройуонугар “Умнас” эрэгийиэннээҕи суол үс учаастагар өрөмүөн үлэтэ түмүктэнэн эрэр. Ол туһунан оройуон баһылыга Олег Иринеев иһитиннэрдэ.

Булгунньахтаах уонна Улахан-Аан икки ардыларынан 13 килэмиэтир уһуннаах суол өрөмүөннэнэн бүтэн эрэр. Онно ууну ыытар турбалары уларыталлар уонна суол иэнин кэҥэтэллэр. Ой сэлиэнньэтигэр 4 килэмиэтир уһуннаах учаастакка аспаалынан бүрүйүү уонна суолу кэҥэтии үлэтэ ыытыллар. Покровскайга 2 килэмиэтир уһуннаах суол оҥоһуллар, аспаалынан бүрүйэллэр уонна Покровка үрэххэ ууну ыытар турбаны уларыталлар, — диэн баһылык кэпсээтэ.

“Умнас” суол учаастактарыгар өрөмүөн “Куттала суох хаачыстыбалаах суоллар” национальнай бырайыак чэрчитинэн ыытыллар. Кыраапык быһыытынан, өрөмүөн үлэтэ алтынньыга бүтүөхтээх. Бу үлэҕэ барыта 342 мөлүйүөн солкуобай көрүллүбүт.

 

Ангелина Васильева, “Саха сирэ” хаһыат, edersaas.ru

Хаартыска: СИА.

0
0
Telegram Whatsapp