Саха сиригэр кэлэн үөрэнэ сылдьыбыт, билигин Турцияҕа олорор филологическай наука дуоктара Умит Шаһин сахаларга турок тылын үөрэтиэҕэ. Үөрэҕэ муус устар 24 күнүттэн саҕаланыаҕа.
Умит бэлиэтииринэн, кини кууруһун уратыта диэн сахалыыттан тута турок тылын үөрэтии буолар.
— Саха тылын үөрэтэ сылдьан сахаларга турок тылын быһа үөрэппит киһи диэн саныыр этим. Тоҕо диэтэргин, тылларбыт уруулуу буоланнар, үөрэтэргэ да, ылынарга да чэпчэки. Уонна киһи ханнык да тылынан эргиппэккэ эрэ бэйэтин төрөөбүт тылыттан тута омук тылын үөрэтэрэ быдан судургу буолар. Холобур, нууччалыы суруллубут кинигэлэринэн хайа баҕарар үөрэтиэххэ сөп эрээри, бэйэҥ тылгынан быһааран биэрбиттэрэ быдан атын буолар, — диир кини.
Умит хас да кууруһу ыытар былааннаах. Бастакы кууруһа 14 нэдиэлэ буолуоҕа, уруоктар хас өрөбүл аайы нэдиэлэҕэ биирдиитэ ыытыллыахтара. Үөрэх куйаар ситиминэн барыаҕа.
—Кэлин дьон бэйэбэр тахсан «уруок биэрбэккин дуо?» диэн ыйыталаһан барбыта. Кинилэргэ көмө буоллун диэн электроннай кинигэ ыытар этим, ол эрээри дьон «кэпсэтии наада эбит, бэйэҥ үөрэппэккин дуо?» дииллэрэ. Онон кыра-кыралаан кууруспун толкуйдаан киирэн барбытым. Киһи син биир ылбычча тута бырагыраама оҥорон кэбиспэт эбит, ону оҥорууга өр тээтэҥнээбитим. Онон бу кууруһум, бастатан туран, туроктыы саҥарыан, билиэн-көрүөн баҕарар дьоҥҥо туһуланыаҕа, — диэн бэлиэтиир Умит.
Аграфена КУЗЬМИНА.