Эдьигээн оҕолоро дьоҥҥо үөрүүнэн көмөлөһөллөр
Эдьигээн орто оскуолатын 8 “б” кылааһын үөрэнээччилэрэ (кылаас сал. М.Николаева) үтүө санааланыы чэрчитинэн ыытыллыбыт аахсыйаҕа көхтөөхтүк кытыннылар.
“Россия ийэлэрэ” Бүтүн Россиятааҕы уопсастыбаннай тэрилтэ улуустааҕы салаата тэрийбит “Үтүө санааланыы корзинатыгар” кинилэр төрөппүттэрин кытта көмөлөөн 1600 солк. суумалаах аһы-үөлү хомуйдулар. Итиэннэ СӨ Аҕалар күннэрин көрсө диэн ааттаан туран, Бескорованнайдар дьиэ кэргэҥҥэ туттардылар.
“Киһи киһиэхэ эйэҕэстик сыһыаннаһыахтаах, үчүгэйи оҥоруохтаах, көмөлөһүөхтээх. Онуоха бу аахсыйа үтүө санаалаах буоларга үөрэтэр. Аныгыскы тэрээһиҥҥэ хайаан да кыттыахпыт”, — диэтилэр Настя Элляева, Наташа Жиркова, Таня Шемякова.
Сардаана МАТВЕЕВА, Эдьигээн.
Горнайдар доруобуйа боппуруоһун инники күөҥҥэ туталлар
Бэрдьигэстээххэ Петр Аввакумов аатынан улуустааҕы киин бибилэтиэкэҕэ улуус кылаабынай бырааһа Геннадий Егоров олохтоохтору кытары көрүстэ.
Көрсүһүүгэ оскуола үөрэнээччилэрэ уонна бочуоттаах сынньалаҥҥа олорооччулар кытыннылар. Дьон-сэргэ ордук өрөспүүбүлүкэ киин балыыһаларыгар уонна гериатрическай балыыһаҕа хайдах көрдөрөбүт диэн ыйыталаста, сүбэ-ама ылла. Маны сэргэ, улуустарын киинигэр оҕо бырааһыгар көрдөрөргө олус уһуннук уочараттыылларын ыйдылар, ити кыһалҕаны быһаарар наадатын эттилэр. Бу күн Анжелика Гаврильева дириэктэрдээх Бэрдьигэстээх орто оскуолатын үөрэнээччилэрэ улахан көрдөһүүлээх кэлбиттэр. Оскуолаларын выпускнига бүөрэ мөлтөх буолан, Дьокуускай куоракка гемодиализ ыларын, киниэхэ хайаан да көмөлөһөр наадатын эттилэр. СӨ доруобуйа харыстабылын министиэристибэтиттэн квотаны суһаллык булан биэрэргэ көрдөстүлэр.
Геннадий Маркович бары этиилэри болҕойон иһиттэ, ыйытыыларга хоруйдаата. Көрсүһүү бүтүүтэ солбуйааччытыгар Жанна Андрееваҕа киирбит этиилэри болҕомтоҕо ылан салгыы дьарыктанарга, дьон кыһалҕатыгар көмөлөһөргө сорудахтаата.
Анна ИВАНОВА, Бэрдьигэстээх.
Оҕолор оҕолорго сэргэх тэрээһини тэрийдилэр
Усуйаанаҕа Силээннээх оскуолатын алын сүһүөх кылааһыгар үөрэнэр оҕолор экскурсияҕа сырыттылар.
Усуйаанаҕа педагог-тэрийээччи Люция Олесова салайар «Дьулуур» оҕо-аймах биир сомоҕо хамсааһына П.Николаев аатынан Силээннээх орто оскуолатыгар үөрэнэр алын сүһүөх кылаас үөрэнээччилэригэр умнуллубат күнү бэлэхтээтэ.
Бастатан туран, оҕолор «Саһарҕа» мусуойга сырыттылар. Манна «дьулуурдар» кырачаан ыалдьыттарга улуустарын бочуоттаах олохтоохторун, кинилэр дойдуларыгар киллэрсибит көмүс кылааттарын, үлэлэрин-хамнастарын туһунан билиһиннэрдилэр. Салгыы дойдуларын айылҕатын, кыылын-сүөлүн, көтөрүн-сүүрэрин туһунан бэрт элбэҕи кэпсээтилэр. Онтон остуол оонньууларын туһунан сырдатан баран, хаамыскаҕа күрэхтэһиини тэрийдилэр. Манна оҕолор умсугуйан оонньоотулар.
Тэрээһин түмүгэр, Люция Николаевна сэттис кылаас үөрэнээччилэригэр А.Слепцоваҕа, Г.Суздаловка, алтыска үөрэнэр М.Рожинаҕа олус интэриэһинэйдик кэпсээбиттэрин бэлиэтээн туран, түөскэ анньыллар бэлиэлэри туттарда. Кэлэр да өттүгэр бу курдук көрсүһүүлэр, күрэхтэһиилэр салҕаналларыгар баҕарда.
Милена РОЖИНА, Усуйаана.
Быысыбай быыһыгар быр-бааччы
Таатта улууһун Дьохсоҕон нэһилиэгэр «Көмүс сүүтүк» диэн иистэнньэҥ дьахталлар түмсүүлэрэ үлэтин кэҥэтэн, сайыннаран иһэр. Манна эдэркээн оҕотуттан саҕалаан, аҕам саастаахтарга тиийэ сөбүлээн дьарыктаналлар.
Соторутааҕыта нэһилиэктэригэр, А.Андреев аатынан “Сырал тулааһына” диэн саха балаҕаныгар, улахан дьиэ кэргэн күн күбэй ийэтэ, тапталлаах эбэтэ Клара Ючюгяева быыстапката буолла. «Көмүс сүүтүк» уран тарбахтаах иистэнньэҥэ 20-тэн тахса үлэтин дойдулаахтарын көрүүтүгэр-истиитигэр таһаарда. Клара Егоровна оҕуруонан, мулине сабынан тикпит, кылабачыгас таастары сыһыартаан оҥорбут кэрэттэн кэрэ хартыыналарын көрбүт эрэ бары сөхтө, хайҕаата. Мустубут дьон салгыы быысыбай быыһыгар олорон иистэнэргэ үөрэннилэр, сүбэ-ама ыллылар.
Бэйэбит корр.,«Саха сирэ» хаһыат, edersaas.ru