Алданнар хайыһардаан кыыраттылар
Алдаҥҥа «Лыжня России» олус көхтөөхтүк ааста. Кырачаан оҕотуттан кырдьаҕаһыгар тиийэ, барыта 470-ча киһи, өрөбүллэригэр хайыһардаан кыыраттылар. Бу күн эр дьон 5 км, дьахталлар 1977-1999 с.т. 3 км, онтон аҕа саастаахтар 2 км сүүрдүлэр.
Оскуолаҕа киириэн иннинээҕи саастаах кырачааннар 400 м хайыһардаан көрөөччүлэри манньыттылар. Алданнааҕы политехническэй техникум уонна оскуола үөрэнээччилэрэ эрбии тииһин курдук эгил-тэгил киирсэннэр, үчүгэй бэлэмнээхтэрин көрдөрдүлэр. Онтон тэрилтэ салайааччылара илин-кэлин тардыһыылаах сытыы күрэхтэһиилэрэ болҕомтону улаханнык тарта.
Алданнар спорт бу көрүҥүнэн сөбүлээн дьарыктаналлара элбэх киһи кыттыбытыттан көстөр. Бу күн дьиэ кэргэнинэн, тэрилтэнэн маассабай сүүрүүгэ күннээтилэр. Түмүккэ көхтөөх кыттыыны ылбыттарга уонна кыайыылаахтарга махтал суруктар туттарылыннылар.
Алдан оройуонун дьаһалтатын пресс-сулууспата.
Семен Данилов төрөөбүтэ 100 сылыгар хоһоон, ырыа куонкуруһа буолла
Дьокуускайга А.Кулаковскай аатынан култуура киинигэр Саха норуодунай бэйиэтэ Семен Данилов төрөөбүтэ 100 сылынан өрөспүүбүлүкэҕэ ааҕыы уонна ырыа күөн күрэһэ буолла.
Ааҕыы күрэһин самодеятельнай уонна профессиональнай ааҕааччылар диэн икки бөлөххө арааран дьүүллээтилэр. Дьүүллүүр сүбэҕэ хомоҕой хоһоонноох бэйиэттэр: С.В. Гольдерова – Саргы Куо, Е.В. Слепцова – Куорсуннаах, СӨ норуодунай артыыһа З.П. Багынанова, СӨ үтүөлээх артыыһа М.Н. Данилова үлэлээтилэр.
Саха сиринээҕи култуура уонна ускуустуба коллеһын төрүт култуура салаатын бастакы кууруһун устудьуоннара бу күрэскэ «Эйгэ» народнай студенческай тыйаатыр (сал. Боппоенова М.Г., Лыткина Г.А.) аатыттан профессионаллар бөлөхтөрүгэр кытыннылар. Бөлөҕүнэн Семен Данилов айымньыларынан «Дьолун булбут мин дойдум», «Эр киһи ыралаах ырыата» уонна «Дьылҕам хаартан төрүттээх» композицияларын көрдөрдүлэр, биирдиилээн толорууга Виктория Домнина «Өбүгэ өһө», Анатолий Свинобоев «Дойдум дьоно» хоһооннору аахтылар.
Икки күннээх тыҥааһыннаах күрэс түмүгүнэн «Дылҕам хаартан төрүттээх» композиция Гран-при үрдүк аатын ылан, бөлөх кыттааччылара Горнай улууһун дьаһалтатын аатыттан 20.000 солк. уу харчынан наҕараадаланнылар. Биирдиилээн ааҕааччыларга Анатолий Свинобоев II степеннээх, Виктория Домнина III степеннээх дипломнарынан, «Дьолун булбут мин дойдум» композиция «Хоһоону чаҕылхайдык күргүөмүнэн ааҕыы» анал аакка тигистилэр.
Оҕолор Семен Данилов айымньыларын нөҥүө үрдүк поэзияны кытта алтыстылар. Биир айымньы төһөлөөх элбэҕи этэрин, айымньы нөңүө киһи бэйэтигэр үтүмэн элбэх сырдыгы, кэрэни иҥэринэрин эттэринэн-хааннарынан биллилэр. Маннык түһүлгэлэр саха оҕото норуотун тылынан санаатын сайа этинэ үөрэнэригэр, бэйэтин дойдутунан киэн тутта үүнэригэр муҥура суох кылааты киллэрэллэрин, ыччаты иитиигэ улахан төһүү күүс буолалларын дьүүллүүр сүбэ чилиэттэрэ, көрөөччүлэр бэлиэтээн эттилэр.
М.Боппоенова, Г.Лыткина, Дьокуускай.
Сунтаарга куйуурга күрэхтэстилэр
Тэҥкэ нэһилиэгин Саҥа Күөлүгэр «Бизнес киин» МАУ, «Тэҥкэ» турбазата куйуур тэрийдилэр.
Куйуурдааһыҥҥа Ньурба улууһун Таркаайы нэһилиэгиттэн икки хамаанда, Өҥөлдьөттөн икки хамаанда, Мииринэй оройуонун Арыылааҕыттан биир хамаанда, Сунтаар улууһун Куокуну нэһилиэгиттэн икки хамаанда, Бордоҥ нэһилиэгиттэн үс хамаанда кытыннылар. Илимниир, Сунтаар, Сиэйэ, Хадан нэһилиэктэрэ биирдии хамаанданы туруордулар. Хамаанда үс кыттааччылаах (18-30 диэри, 31-50 диэри уонна 51-тэн үөһэ саастаах дьон).
Күрэхтэһии хара маҥнайгыттан олус тыҥааһыннаахтык, көхтөөхтүк барда. Ойбон алларыылаах эстэпиэтэ, бэрэбинэҕэ туран сыттыгынан охсуһуу, кууллаах хаары сүгэн сүүрүү, хамаандаттан биирдии киһи иккилии ойбону алларыыта олус сэргэх буолла. Сытыы киирсиигэ ким бастыырын, бириистээх миэстэҕэ тиксэрин бүтэһик түһүмэх быһаарда. Бүтэһиккэ ылбыт бааллара тэҥнэһэн, ким элбэх балыгы ылбыт ол инники түстэ.
Куокунуга өр сылларга баһылыгынан үлэлээбит, тустууга спорт маастара Валерий Винокуров, дуобакка спорт маастара, тренер Валерий Сидоров, кикбоксиҥҥа аан дойду икки төгүллээх чөмпүйүөнэ, Таркаайы нэһилиэгин баһылыга Василий Васильев судьуйалаатылар. Элбэх киһи хамаандалартан бэрэстэбиитэл быһыытынан үлэлэстилэр.
Күрэхтэһии түмүгүнэн I миэстэни Куокуну иккис хамаандата ылла. II миэстэҕэ Ньурба улууһун Таркаайы иккис хамаандата, III-кэ Хадан хамаандата таҕыстылар. Кыайыылаахтар грамоталарынан, мэтээллэринэн уонна сыаналаах бириистэринэн наҕараадаланнылар. Кыттыбыт хамаандалар араас номинацияларга тигистилэр.
Игорь Индеев, Сунтаар.