Улуустарга бизнеһи уонна туризмы сайыннарыы рейтинг нөҥүө быһаарыллыаҕа
Орто уонна дьоҕус бизнеһи өйүүр үлэни тупсарар уонна сүрүннүүр инниттэн предпринимательство, эргиэн уонна туризм миниистирэ Ирина Высоких бэйэтин салайар тэрилтэлэрин салайааччыларыгар оройуоннааҕы муниципальнай тэриллиилэр бу салааҕа ыытар үлэлэрин анал рейтининэн сыаналыырга сорудахтаата.
edersaas.ru
Ол курдук, өрөспүүбүлүкэтээҕи региональнай лизинговай хампаанньа, Бизнес-оскуола, “Якутия” туристскай иһитиннэрэр киин (ТИЦ), СӨ предпринимательствоны өйүүр, “Якутия” кластернай сайдыы кииннэрэ уонна предпринимательство сайдыытын пуондата улуустар муниципалитеттара дьоҕус уонна орто бизнеһи өйүүр үлэлэрин түмүгүн таһаарыахтара.
— Рейтинг тиһигин киллэрэн туран, биһиги былаас уонна бизнес бииргэ үлэлээһинннэрин хаачыстыбатын үрдэтэргэ, үлэ бастыҥ уопутун тарҕатарга дьулуһабыт. Туристскай бырайыактары олоххо киллэрии рейтинин таһаарыыны аан бастаан ыытабыт. Онон улуустарга бу эйгэҕэ туох үлэ барара рейтинг нөҥүө дьэҥкэтик көстөн кэлиэҕэ. Кылаабынайа, маннык сыанабыл көмөтүнэн, үлэ хаамыытын түмүгүн кыбаарталынан таһааран истэххэ, баһылыктарга уонна улуустарга бу салааҕа эппиэттээх үлэһиттэргэ эппиэтинэстэрэ да үрдүөҕэ, туризмы сайыннарыыга да миэстэтигэр үлэ көдьүүстээх буолуоҕа, — диэн анаан бэлиэтээтэ миниистир.
Биллэн турар, бу олус сөптөөх быһаарыы улуустарга дьоҕус уонна орто бизнес уонна туризм сайдыытыгар туһуламмыт үлэ биллэ тупсарыгар улахан көдьүүстээх буолуоҕа.
Елена ПОТОЦКАЯ, “Саха сирэ”хаһыат, edersaas.ru
Хаартыска Интэриниэттэн.