Улуустарга ыраах сытар ходуһалары оттуурга аналлаах мобильнай биригээдэлэри тэрийии саҕаланна

Сорох улуустарга олус курааннаабытын, сорохторго аһара ардаабытын үрдүнэн өрөспүүбүлүкэбитигэр от үлэтин үгэнэ барар турар. «Сайын биир күнэ дьылы аһатар», — диэн мээнэҕэ эппэтэх буолуохтаахтар. 

Билигин үгүс улуустар ыраах сирдэргэ үүммүт оту ылар инниттэн мобильнай дэниллэр биригээдэлэри тэрийэн эрэллэр. Холобур, улуус дьаһалталара атырдьах ыйыгар диэри төһө от хомулларын ааҕан-суоттаан баран, тустаах министиэристибэҕэ анал биригээдэлэри тэрийэн, үбү көрдөрүүгэ сайаапка түһэрэллэрин туһунан иһитиннэриэхтээхтэр. Бу иннинэ Ил Дархан Айсен Николаев мөлтөх туруктаах суоллаах-иистээх улуустар мобильнай биригээдэлэри тэрийэллэригэр сорудахтаабыта.

От ыйын 14 күнүнээҕи туругунан от хампаанньатыгар 1492 звено үлэлиир. Ходуһаларга барыта 1516 тыраактар уонна 3359 киһи үлэлии сылдьар. Ыйыллыбыт күҥҥэ 6 тыһ. гектар иэннээх сир охсуллубут, 1956 туонна от бэлэмнэниллибит, былаантан 0,4 %-на эрэ кээрэтиллибит.

Быйыл өлгөм үүнүү Ленскэй, Бүлүү уонна Хаҥалас улуустарыгар бэлиэтэнэр. Бүлүү уонна Хаҥалас улуустарыгар бу күннэргэ аһара ардаан үрэхтэргэ уу киирэн, сорох ходуһалары ылар чинчилээх. Дьааҥы, Кэбээйи уонна Горнай улуустарыгар үрэхтэргэ уу киирэн, оттонор ходуһалар ууга баран, кэккэ уустуктары үөскэттэ.

«Үгүс улуустарга уустуктар бүрүүкээбиттэрин үрдүнэн, төһө кыалларынан, ылыммыт былааннарын толоро сатыахтара. Былааны толорууга сүрүн төһүү күүһүнэн мобильнай биригээдэлэр буолаллар, биригээдэлэр кэмигэр тэриллэн, күүскэ оттуур түгэннэригэр, кэлэр дьылы туоруур от бэлэмнэниллиэҕэ. Аграрийдар, төһө кыалларынан, баар ходуһаны барытын оттуохтаахтар. Иккиһинэн, улуустар атын улуустарга баар сирдэри оттуурга эрдэттэн кэпсэтиини ыытан, үлэлиэхтэрин наада», — диэн тыа хаһаайыстыбатын миниистирин солбуйааччы Николай Афанасьев баар балаһыанньаны иһитиннэрдэ.