Бүгүн, кулун тутар 22 күнүгэр, 12:00 чааска Саха сирин бырабыыталыстыбатын бэрэссэдээтэлин солбуйааччы Ольга Балабкина эрэгийиэҥҥэ коронавирус балаһыанньатын туһунан брифиҥҥэ кэпсээтэ.
edersaas.ru
— Ааспыт сууккаҕа өрөспүүбүлүкэ үрдүнэн 31 киһи ыарыйда. Ол иһигэр Дьокуускайга — 20 киһи, Алдан оройуонугар — үс киһи, Бүлүү, Мииринэй, Таатта улуустарыгар иккилии, Хаҥалас уонна Чурапчы улуустарыгар биирдии киһи ыарыйда.
Бүтэһик икки ыйы кэтээн көрөн этэр буоллахха, улуустарга коронавирус тарҕаныыта тохтоон эрэр, оттон Дьокуускайга биир кэм турар.
Хамсык саҕаланыаҕыттан, өрөспүүбүлүкэҕэ мөлүйүөҥҥэ чугаһыыр тест оҥоһулунна.
Нэһилиэнньэни вакциянациялааһын салҕанар. Бүгүҥҥү күн туругунан, кэлбит вакцина 99,5 %-на туттулунна. Быһыы иккис түһүмэҕэр ыҥырабыт.
Ил Дархан ыйааҕынан араас эбийиэктэргэ, тэрээһиннэргэ хааччах уһуллубута. Ол да үрдүнэн, маасканы кэтии, социальнай дистанцияны тутуһуу ирдэнэрин умнумаҥ. Аны атын эрэгийиэннэртэн кэлэр үлэһиттэр тулалыыр дьоҥҥо эппиэтинэстээхтик сыһыаннаһыҥ диэн ыҥырыам этэ. Холобура, Алдан оройуонугар үксүн кэлии дьон ыарыыны сыһыараллар эбит, – диэн Ольга Балабкина быһа эпииргэ кэпсээтэ.
Виктория Бястинова, edersaas.ru саайт.
Хаартыска — СИА.