Уопсастыба

Улуустарга быһыыны биэрии тэтимэ көрүллэр

Биир хонук устатыгар өрөспүүбүлүкэ лабораторияларыгар 3 965 анаалыс оҥоһуллубут. Оттон пандемия саҕаланыаҕыттан 1 360 568 тест бэрэбиэркэлэммит.

Коронавирустаабыттар эрэ тест туттарбаттар, тымныйан ыалдьыбыттар (ОРВИ) уонна санитарнай-эпидемиологическай быһы-майгы уустук эрэгийиэннэриттэн баахтабай ньыманан үлэлии кэлбиттэр эмиэ туттараллар.

Өрөспүүбүлүкэҕэ коронавируһу утары быһыыны оҥоруу салҕанар. Билиҥҥи туругунан 461 755 доза «Спутник Лайт» вакцина аҕалыллыбыт. Сыл аҥаарын анараа өттүгэр быһыыны ылбыттарга ревакцинациялааһын саҕаланна.

Бүгүҥҥү күн туругунан быһыы бастакы компоненын 302 480 киһи ылбыт. 4 590 киһи ревакцинацияламмыт. Өрөспүүбүлүкэҕэ аҕалыллыбыт вакцинаттан 70% туһаныллыбыт.

«Өрөспүүбүлүкэтээҕи суһал ыстаап улуустарга быһыыны биэрии хампаанньата хайдах ыытылларын күн ахсын көрөр. Бүгүн СӨ Ил Дарханын сорудаҕынан, өрөспүүбүлүкэтээҕи суһал ыстаап бөлөҕө быһыыны  биэрии тэтимэ намыһах оройуонугар Үөһээ Бүлүүгэ барда. Суһал бөлөх сарсын оройуоҥҥа быһыыны биэрии тоҕо намыһаҕын быһааран иһитиннэрии оҥоруоҕа. Түмүккэ Үөһээ Бүлүү улууһугар санитарнай этэҥҥэ буолууну чөлүгэр түһэрэргэ тэрийэр үлэ ыытыллыа», — диэн СӨ Бырабыыталыстыбатын вице-премьерэ, өрөспүүбүлүкэтээҕи суһал ыстаап салайааччытын солбуйааччы Ольга Балабкина иһитиннэрдэ.

0
0