Улуустарга IT-технология сайдыа дуо?

02.12.2020
Бөлөххө киир:

Икки сыллааҕыта Дьокуускай куоракка Уһук Илиҥҥэ аан маҥнайгы IT-паарка арыллыбыта. Онтон ыла Ил Дархан ыйааҕар олоҕуран, өрөспүүбүлүкэбит араас муннуктарыгар IT-кииннэр сыыйа арыллан  эрэллэр. Ханнык улуустарга диир буоллаххытына, СӨ инновациятын уонна цифровой сайдыытын министиэристибэтэ биллэрбит куонкурсугар кыайбыт улуустарга.

Муус устарга биллэриллибит куонкуруска уопсайа 14 сайаапка киирбититтэн сэттэтэ талыллыбыта. Олор истэригэр Уус Алдан улууһун Бороҕон сэлиэнньэтэ. Бороҕоннооҕу IT-киин аҕыйах хонуктааҕыта аанын үөрүүлээх быһыыга-майгыга аспыта. Салайааччы Яков Колодезников манныгы кэпсиир:

— Куонкуруска кыайыылааҕынан талыллан, биир мөлүйүөннээх министиэристибэ гранын ылбыппыт. Ону таһынан, Уус Алдан дьаһалтата 400 тыһыынча солкуобайы өрөмүөҥҥэ диэн көрбүтэ. Билигин «Өркөн» култуура киинигэр 70-тан кв.м. тахса сиргэ үлэбитин саҕалаатыбыт.

Эбии үөрэхтээһин ыстаатыттан үлэ миэстэтин көрөммүт, анал IT-үөрэхтээх исписэлиистэри үлэлэтэн эрэбит.

Грант харчытыгар аҕыс көмпүүтэр, үчүгэй кыамталаах икки көмпүүтэри, биир ноутбугу ыламмыт үлэбитин саҕалаатыбыт. Үөрэх управлениета эбии көмпүүтэр бэлэхтиэх буолбута. Сүүс мегабит түргэннээх интэриниэттээхпит.

Биһиги кииммитигэр ханнык баҕарар киһи идиэйэлээх кэлэн, бырайыагын олоххо киллэриэн сөп. Кини IT-бородууксуйатын оҥорон таһаарарыгар биһиги былаһааккабыт көмө, тирэх буолуохтаах. Ону таһынан, нэһилиэнньэни көмпүүтэргэ, интэриниэккэ үөрэтэн саҕалыахпыт.

Бу иннинэ даҕаны биһиги улууспутугар IT-технологиянан дьарыктанар ыччат баара. Кинилэр икки сыл устата IT-хакатон диэн IT-паарка ыытар куонкурсугар кыттыбыттара, кыттыахтара даҕаны турдаҕа.

Инникитин былаан элбэх. Холобура, Бороҕоҥҥо 2022 сылга буолаары турар спортивнай оонньууларга кыттааччыларга, ыалдьыттарга анаан төлөпүөн сыһыарыытын оҥоруохпутун баҕарабыт. Онно улуус, Бороҕон каартата, олохтоон түһэр сирдэр төлөпүөннэрэ, эбийиэк турар сирэ, ууну хайдах сакаастыахха сөбүн уонна да атын туһалаах информациялары киллэриэхпит.

Инникитин атын IT-тэрилтэлэри кытары уопут атастаһыыга үлэлэһиэхпит диэн эрэллээхпин.


Бороҕон киинин кэнниттэн Покровскайдааҕы IT-паарка арылынна. Салайааччы Александр Лебедев манныгы кэпсээтэ:

— Биһиги эмиэ граҥҥа хапсаммыт, IT-паарканы тэринэммит үөрэн олоробут. «Саргы түһүлгэтэ» култуура киинэ 67 кв.м. иэннээх хоһу биэрэн, ону өрөмүөннээммит арылынныбыт. Инновация министиэристибэтэ биэрбит испииһэгинэн эмиэ икки улахан кыамталаах iМac көмпүүтэр, алта windows-көмпүүтэр, ноутбук, проектор, миэбэл ылынныбыт. Үлэлии сылдьар үс урбаанньыттары резиден быһыытынан ыллыбыт. Уопсайынан, пааркабыт идиэйэлээх дьон мустар, толкуйдуур, айар-тутар сирдэрэ буолуохтаах. Инникитин былааммыт элбэх. Хаҥалас улууһун туризмыгар, үөрэхтээһинигэр бырайыактары оҥоруохпут. Сынньалаҥҥа эмиэ мобильнай сыһыарыы бырайыага баар. Пандемия буолан, дьон кэлэрэ аҕыйах. Ол да буоллар, Хаҥалас улууһун идиэйэлээх дьонун ыҥырабыт.

Бу курдук улуустарга үрдүкү технология , биисинэс, саҥалыы толкуй түмсүүлэрэ бааллара олус үчүгэй. Онон ыстатыйам аатыгар баар ыйытыыга дорҕооннохтук «сайдыаҕа» дииргэ кыах үөскүүр.

Виктория Бястинова, «Саха сирэ» хаһыат, edersaas.ru

+1
0
+1
0
+1
0
+1
0
+1
0
+1
0
+1
0