Маны аах Уопсастыба

Улуустардааҕы дьахталлар сэбиэттэрэ социальнай ситимнэри баһылаан эрэллэр

Быйылгы Ил Дархан гражданскай уопсастыба институттарын өйүүргэ туһуламмыт гранын куонкуруhугар хаhааҥҥытааҕар да элбэх сайаапка киирбитэ.

Суолталаах тэрээһиҥҥэ СӨ Дьахталларын уопсастыбаннай тэрилтэлэрин сойууһа эмиэ ситиһиилээхтик кыттыбыта.

Сойуус бэрэссэдээтэлэ, РФ Дьахталларын сойууһун Бюротун чилиэнэ  Анжелика Андреева куонкуруска кыттыы туһунан санаатын бу курдук үллэһиннэ:

Өрөспүүбүлүкэбитигэр  1700 социальнай хайысхалаах уопсастыбаннай түмсүү баар. Ил Дархан граныгар 29 улуустан 342 уопсастыбаннай тэрилтэттэн биһиги курдук 424 бырайыак киирбит.

Онтон 80 бырайыак кыайыылааҕынан ааттанна. Кинилэр истэригэр биһиги кыттыыны ылан кыайан, икки бүк олус үөрдүбүт.  Ол, арааһа, былырыын бырайыакпыт ааспатаҕын кытта сибээстээх буолуон сөп. Онон бастаан табыллыбатаҕына, санааны түһэрбэккэ, инниҥ хоту баран иһэр ордугун дакаастаатыбыт.

Биһиги уопсастыбаннай тэрилтэбит араас тэрээһиннэри ыытан, өрөспүүбүлүкэ дьахталларын биир сомоҕо гынан түмэ олорор.

Былырыын Алдан, Хаҥалас, Нам уонна Мэҥэ Хаҥалас бэрэстэбиитэллэрэ дьахталлар түмсүүлэрин үлэлэрин сыыппара эйгэтигэр көһөрөргө этии киллэрбиттэрэ.  Кырдьык, аныгы үйэҕэ куйаар ситимин хайысхатынан үлэлии олорор кэмҥэ сайдыы тосхоло ол эрэ буоларын өйдүөх кэриҥнээхпит.

Сыстыганнаах дьаҥ кэмигэр  хааччаахтааһын миэрэлэринэн сибээстээн, дьиэҕэ олоруу кэмигэр олох сыыппаранан хаамыытын тэтиминэн барарын көрдөрдө. Бу күннэргэ улуустарга дьахталлар сэбиэттэрэ инстаграмҥа, фейсбукка бэйэлэрин страницаларын арыйдылар.

Онон үлэбит биллэ тэтимирдэ уонна ис хоһооно дириҥээтэ, бэйэ-бэйэбитин кытта төһө да ыраах буолларбыт, өссө чугаһастыбыт. Куйаар ситиминэн араас тэрээһиннэри, сэминээрдэри, кэмпириэнсийэлэри ыытан эрэбит.

 

Елена ПОТОЦКАЯ, ”Саха сирэ” хаһыат, edersaas.ru

Хаартыска  — ааптар түһэриитэ.

1
0