Уопсастыбаннай тэрилтэлэр ойуур баһаарын умулларыыга өйөбүл буолан, төһүү күүһүнэн буоллалар.
Нэдиэлэ саҥатыгар уопсастыбаннай добровольческай ыстааптан Нам улууһугар анал бөлөх тиийэн үлэлээтэ. Бу туһунан өрөспүүбүлүкэ улуустарын түмсүүлэрин сэбиэтин салайааччы Иван Неустроев кэпсиир:
— Дьокуускай куорат аҕа баһылыгын көҕүлээһининэн быйыл сайын улуустар түмсүүлэрэ мустан, сэбиэт тэриммиппит. Ойуур баһаарын бохсууга үлэлии сылдьар дьоҥҥо көмө оҥорууга улуустар түмсүүлэрэ үгүс тэрийэр үлэни ыытабыт. Бары тэрээһин үлэни сүрүннүүр уопсастыбаннай добровольческай ыстаабы кытта ыкса сибээстээхтик үлэлиибит.
Бу күннэргэ Нам улууһун түмсүүтүн салайааччыта Гаврил Местников туруорсуутунан атырдьах ыйын 16 күнүгэр Нам улууһугар тахса сырыттыбыт. Биһиги сылдьарбытыгар манна 405249 га сиргэ 5 баһаар буола турара. Бөлөхпүт састаабыгар баһаары бохсууга үлэни ыытар уопсастыбаннай добровольческай ыстаап бэрэссэдээтэлин солбуйааччы Людмила Николаева, Нам улууһун түмсүүтүн салайааччытын солбуйааччы Мария Габышева кыттыһан, Фрунзеҕа уонна Көбөкөҥҥө сырыттыбыт. Ойуур баһаарын бохсууга олохтоох нэһилиэнньэ, баҕа өттүнэн көмөлөһөр дьон, уоту утары охсуһар анал идэлээх дьон уоту кытта хорсуннук туруулаһа сылдьаллара. Фрунзе нэһилиэгэ “ДТ” тыраахтара суох, биир эрэ «МТЗ»-лаах эбит. Биир интэриэһинэй түгэни кэпсээтилэр. Ойуур баһаара нэһилиэккэ суоһуур саамай ыксаллаах кэмигэр минерализованнай балаһаны оҥорууга хорсун санаалаах тырахтарыыс 3 суукка устата көлөтүттэн түспэккэ үлэлээбит. Кинини сынньатаары атын киһини тыраахтарга олортоллор эрэ, ойуур иһигэр киирэн үлэлиир кэмҥэ булууктара хайа тардыллан иһэр үһү. Инньэ гынан көлөлөөх киһини солбуйбакка, аһыыр аһын, иһэр уутун бытыылкаҕа кутан баран, айаннаан иһэр тыраахтарга түннүгүнэн быраҕан биэрэллэр эбит. Оннук тыраахтар уонна киһи арахсыбакка 3 суукка устата үлэлээбиттэр.
Бу икки нэһилиэк сүрүн кыһалҕалара – уот лиинийэтин остуолбаларын чөлүгэр түһэрии. Ойуур баһаара остуолбалары суулларбыт буолан, уот баран, дьон кыстыкка киириэххэ диэри холодильникка хаһааммыт астара буорту буолбут. Иккис кыһалҕа – уматыктара бүппүт. Үһүс — суотабай сибээс суоҕа. Ити курдук, кыралаан да буоллар, бииртэн биир уустук боппуруос үөскээн иһэр эбит. Людмила Николаева улуус баһылыга бу маны барытын сурукка тиһэн ыытарыгар сүбэлээтэ. Маны таһынан, Людмила Валерьевна олохтоохтору кытта ойуур баһаарын эрэ кыһалҕаларын буолбакка, инникитин өрүс уҥуор өттүгэр сытар, суол-иис суох нэһилиэктэригэр үлэни тэрийэр, дьон дохуоттаах буолуутун ситиһэр туһугар тугу гыныахха сөбүн сүбэлэстэ. Онон бу кэпсэтии олохтоохтору толкуйга түһэрдэ.
… Ити курдук, уопсастыбанньыктар улахан да, кыра да кыһалҕалаах боппуруостары быһаарыыга олохтоох дьаһалталарга күүс-көмө буолаллар.
Елена ПОТОЦКАЯ, “Саха сирэ” хаһыат.