Хотугу улуустар ходуһаларын уу ылбытынан итиэннэ кэккэ нэһилиэктэр курааннаабыттарынан, улуустар иннилэригэр окко былааны толорбуту таһынан, өрөспүүбүлүкэ саппаас пуондатын хаҥатар сорук турар.
Таатта. Бырабыыталыстыба бэрэссэдээтэлин бастакы солбуйааччы – тыа хаһаайыстыбатын уонна ас-үөл бэлиитикэтин миниистирэ Петр Алексеев от ыйын 13-15 күннэригэр бу улууска сылдьан, ходуһалары көрдө, хаһаайыстыбалар салайааччыларын кытары көрүстэ. Олохтоохтор сүрүннээн сир оҥоһуутугар долгуйалларын биллэрдилэр, быраҕыллыбыт ходуһалары, бааһыналары сөргүтэн, бурдугу уонна элбэх сыллаах оту ыһарга үлэлиэхтэрин баҕаралларын эттилэр.
Амма өрүс кытылыгар сытар нэһилиэктэргэ үүнүү куһаҕана суох. Ити иһин Петр Николаевич Ытык Күөлгэ тэриллибит улахан мунньахха саппааска оттуурга эттэ. Биллэрин курдук, бу улуус “Халыма» федеральнай суолга сытар буолан, мантан оту хоту тиэйэргэ бэрт табыгастаах.
Улуус быйыл 36 тыһ. 531 т оту соҕотуопкалыыр былааннаах, ону таһынан өрөспүүбүлүкэтээҕи саппаас пуондатыгар 1 тыһ. туоннаны оттуур буолла. Былырыын 35 тыһ. 200 туоннаҕа былааннааҕын аһара толорон, 36 тыһ. туоннаны оттообута.
Сунтаар. Улуус быйыл 35 тыһ. 378 т оту соҕотуопкалыыр былааннаах. Үүнүү куһаҕана суох, ол эрээри, ардах хаппатах сирдэрэ халтаҥнаабыттар. Онон хаһаайыстыбалар хотуурдарын эрдэ тыаһаппыттара, инньэ гынан күн бүгүҥҥү туругунан, 612 гектар ходуһа охсуллан нэлэһийдэ, барыта 129 туонна от кэбиһилиннэ. Бастакы саҕалааһыҥҥа ити куһаҕана суох көрдөрүү.
Отчуттар бу ый ардахтаах буолуо диэн дьиксинэллэр итиэннэ күнү-дьылы кэтээн көрөр сулууспа үлэһиттэрэ халлаан туругун сыысхала суох биэрэллэригэр баҕараллар.
Тыа хаһаайыстыбатын управлениетын начаалынньыга Иван Тихонов үүнүүнү көрөн-истэн, нэһилиэктэр баһылыктарын уонна хаһаайыстыбалар салайааччыларын кытары мунньахтаан, кинилэр санааларын истэн-үөрэтэн баран, саппааска 500 туоннаны оттуохпутун сөп диэн быһаарда. Онуоха анаан 3 мөл. солк. эбии көрөргө этии киллэрдэ. Бу туһунан биһиэхэ Сунтаартан уопсастыбаннай кэрэспэдьиэммит Борис Потапов иһитиннэрдэ.
Раиса СИБИРЯКОВА, “Саха сирэ” хаһыат, edersaas.ru