Быйыл Саха сирин бары улуустарыгар оттук сезона кэмигэр саҕаламмыта. Ол эрээри сорох улуустар туһааннаах докумуоннарын ситэ оҥоро иликтэр. Бу туһунан бүгүн Ил Дархан Айсен Николаев улуустар баһылыктарын кытары быһа сибээһинэн ыыппыт мунньаҕар бэлиэтээн эттэ.
Быйылгы оттук сезонугар барыта 1165 хочуолунай, 4356 км усталаах ититэр ситим, 1604 км – уу ситимэ, 762,5 км – туттуллубут уу сүүрэр сирэ, 29,5 тыһ. км – уот ситимэ уонна 144 дизельнэй станция бэлэмнэниллибитэ. Сэтинньи 10 күнүнээҕи туругунан, Ленскэй куорат уонна 23 муниципальнай тэриллии оттук сезонугар толору бэлэм буолуу пааспарын ыла иликтэр.
– Биһиги эрэгийиэммит ураты айылҕалаах буолан, кыстыкка бэлэмнэнии тыын боппуруоспут. Олох-дьаһах, коммунальнай хаһаайыстыба, энергетика эйгэлэрин эбийиэктэрэ хайдах үлэлииллэриттэн кыстыгы хайдах туоруурбут тутулуктаах. Онон кыс хаар ортото ыксаллаах быһыы-майгы тахсыбатын туһугар оттукка толору бэлэм буолуу пааспарын ыла илик улуустар сэтинньи 15 күнүгэр диэри докумуоннаргытын барытын чөкөтүн, – диэн иһитиннэрдэ Айсен Сергеевич.
Итини таһынан бу күннэргэ туһааннаах министиэристибэ оттукка сыһыаннаах бары тэрилтэлэри уонна муниципальнай тэриллиилэри кытары сөҥнөһөн саппаас оттугу таһыыга үлэлэһиэҕэ.
Аграфена КУЗЬМИНА