Сыл бүтүөр диэри улуустар киин балыыһаларыгар 46 аныгы тэрил туруоруллуо.
Рентген-тэрили туруорар сири бэлэмнээһин туһунан боппуруоһу мэдиссиинэ тэрилтэлэрин салайааччыларын кытары мунньахха көрдүлэр. Бырабыыталыстыба вице-премьерэ Ольга Балабкина ыыппыт мунньаҕар «2021-2025 сс. СӨ доруобуйа харыстабылын бастакы сүһүөх звенотун модернизациялааһын» бырагыраамаҕа кыттааччылар санааларын үллэһиннилэр.
2021 сылга СӨ доруобуйа харыстабылын бастакы сүһүөх звенотун модернизациялааһын бырагырааматын иитинэн, мэдиссиинэ тэрилтэлэригэр анаан 46 саҥа тэрили атыылаһан туруорар туһунан былааннаммыта, ол иһигэр рентген-аппарааттар, флюорография, маммография аппарааттара бааллар.
«Барыта олус наадалаах тэриллэр. Улуустарга бу аппарааттары наһаа күүтэллэр. Саҥа тэриллэр хаачыстыбалаахтара, пациены көрөргө куттала суохтара бэлиэтэнэр», — диир Ольга Балабкина.
Аныгы мэдиссиинэ тэриллэрэ, ирдэбил быһыытынан, СанПИНынан бигэргэтиллибит сиргэ туруоруллуохтаахтар. Доруобуйа харыстабылын министиэристибэтин, Үөһээ Халыма, Орто Халыма, Ньурба, Ленскэй, Нерюнгри, Мииринэй, Хаҥалас улуустарын киин балыыһаларын бэрэстэбиитэллэрэ рентген-тэриллэри туруорарга анал хостору бэлэмнээн өрөмүөннэр ыытыллалларын туһунан иһитиннэрдилэр.
Мунньах түмүгэр Ольга Балабкина Доруобуйа харыстабылын министиэристибэтиттэн бэрэстэбиитэллэр Ленскэйгэ Пеледуй бөһүөлэгэр уонна Мииринэй куоракка анал хоһу (миэстэни) бэлэмнээһин боппуруоһунан бара сылдьалларыгар соруйда. Оттон кылаабынай быраастарга өрөмүөн үлэлэрин болдьоммут кэмигэр түмүктүүргэ, аҕалыллар тэрили туруорар сирдэрэ бэлэм буоларын хааччыйарга сорудахтанна.
Хаартыскаҕа: Томпоҕо Хаандыга бөһүөлэгэр киин балыыһаҕа компьютернай томограф
+1
+1
+1
+1
+1
+1
+1