Арассыыйа бырабыыталыстыбатын бэрэссэдээтэлэ, судаарыстыба иккис киһитэ кэлэн, эрэгийиэн олоҕун-дьаһаҕын, үлэни-хамнаһы көрөн-истэн, билсэн барбыта улахан суолталаах. Бу иннинэ да федеральнай киинтэн араас бырайыактарга, Национальнай бырагыраамаларга, социальнай эйгэҕэ кэлэр үбү-харчыны киһи мыыммат этэ. Бу сырыы кэнниттэн араас хайысхаларынан өрөспүүбүлүкэ экэниэмикэтэ өссө сайдарыгар саарбахтааһын суох.
Сунтаардааҕы Н.М. Родионова аатынан Оҕо дьоҕурун сайыннарар киин дириэктэрин солбуйааччы Лидия Ивановна Григорьева ол туһунан бу курдук санаалаах:
— Саха сирин IT-паарката, сороҕор сибээс төһө да мөлтөҕүн иһин, элбэх бырайыактары олоххо киллэрбитин премьер-миниистир Михаил Мишустин кэлэ сылдьан, сэргээн, үрдүктүк сыаналаабытын, цифровой трансформацияҕа үлэ күүскэ барарын итэҕэйбитин көрдүм-иһиттим.
Ити үлэҕэ биһиги улууспут эмиэ инники кэккэҕэ тахсарыгар Н.М. Родионова аатынан Оҕо дьоҕурун сайыннарар киин иһинэн үлэлиир IT-паарка күүс-көмө буолуоҕар эрэнэбин. Ол туһугар биһиги айымньылаахтык үлэлии-хамсыы сылдьабыт, араас ураты бырайыактары үлэлэтэн, олоххо киллэрэбит. Холобур, виртуальнай мусуойу үлэлэтэбит, оҕолорго робототехниканы, урбаан технологиятын, программированиены, дроннары салайыыны, графическай дизайны, о.д.а. сайыннарар дьарыктары ыытабыт. Бу олус кэскиллээх салаа буолар.
Ангелина Васильева, “Саха сирэ” хаһыат”, edersaas.ru
Хаартыскаҕа: Сунтаардааҕы IT-паарка көстүүтэ.