Маны аах Уопсастыба

Улуус ыччата сайыҥҥы лааҕырга түмүстэ

«ZEMA» өрөспүүбүлүкэтээҕи ыччат уопсастыбаннай тэрилтэтэ атырдьах ыйын 12-22 күннэригэр «Сайдар кэм» лааҕыры тэрийэн үлэлэттэ. 

Лааҕыр салайааччыта — Алгыстан Софронов. Лааҕырга сынньаммыт Өймөкөөн улууһун Төрүт орто оскуолатын 10 кылааһын үөрэнээччитэ Кристина Берёзкина бу туһунан маннык кэпсиир:

— Этэрээппитигэр Эбээн Бытантайтан, Уус Алдантан, Горнайтан, Амматтан, Мэҥэ Хаҥаластан, Булуҥтан — барыта биир этэрээккэ 18 киһи сынньанныбыт. 16-21 саастаах ыччаттартан турар уопсайа 9 этэрээт баар этэ. Сэргэлээххэ 9-с уопсайга олордубут. Күн аайы араас тиэмэҕэ лиэксийэлэри иһиттибит, үҥкүү, ырыа куруһуоктарга дьарыктанныбыт. Бородууктабытын эрдэттэн бэйэбитигэр биэрбиттэрэ. Онон күннээҕинэн астанар буолан, устудьуоннар курдук олордубут. Судаарыстыбаннай былаах күнүгэр флешмобка кыттыбыппыт. «Пушкинскай каартанан» Полина Гагарина кэнсиэригэр сырыттыбыт. Устудьуон олоҕо ыарахаттардаах эбит. Барытыгар бэйэҥ эппиэтинэһи, быһаарыыны ылынаҕын. Харчыны сатаан таба туттуохха наада. Мин, дьиҥэр, элбэх дьону сөбүлээбэт этим, чуумпутук сылдьарбын сөбүлүүбүн. Урут хаһан да лааҕырга сылдьыбатах буолан, хайдах эрэ салла санаабытым. Хата, үс хонук иһигэр дьону кытта уопсай тылы булан, наһаа элбэх оҕону кытта доҕордостум. Каникулбун маннык атаарбытым наһаа интэриэһинэй!

Ыччат уопсастыбаннай тэрилтэтэ улуус аайыттан олоххо көхтөөх оҕолору мунньан, устудьуон олоҕор бэлэмниирэ — хайҕаллаах суол.

 Елена ПОТОЦКАЯ, «Саха сирэ» хаһыат.

0
0
Telegram Whatsapp