Чурапчы улууһун баһылыга Степан Саргыдаев уонна улуустааҕы аграрнай-тэхиньиичэскэй кэллиэс дириэктэрэ Василий Гуляев бииргэ үлэлииргэ сөбүлэҥ түһэристилэр.
Өрүттэр үлэҕэ-хамнаска толкуйдаан көрөн интэриэһи учуоттууллара сыал-сорук быһыытынан туруорулунна. Онон кэллиэс тэхиньиичэскэй идэлээх үлэһиттэри бэлэмнээн таһаарарыгар улууһу кытта хардарыта ыкса сибээһи тутан, өйөһөн үлэлииллэригэр болҕомто туһаайыллар. Бу туһунан улуус дьаһалтатын пресс-киинэ иһитиннэрдэ.
Степан Саргыдаев элбэх хайысханан үлэ ыытылларын бэлиэтээтэ. Маныаха сөбүлэһиинэн, квалификацияны үрдэтэргэ быстах кэмнээх куурустар тэриллэллэригэр, улуус тэрилтэлэрин исписэлиистэрин хос бэлэмнииргэ, тыа сирин ыччатын профессиональнай үөрэхтээһиҥҥэ усулуобуйаны тупсарарга, кэллиэһи бүтэрээччилэргэ үлэнэн хааччылыы боппуруоһун түргэнник быһаарарга, быраактыканы баазаҕа баралларыгар кыах бэриллэрэ этиллэр.