Орто үөрэххэ туттарсар абитуриеннар үксүн Дьокуускай куоракка баар үөрэхтэргэ харахтарын хатыыллар. Улуустарга баар таһаарыылаахтык даҕаны үлэлиир үөрэх кыһаларын тумна хаамаллар. Быйылгыттан маныаха саҥа сүүрээни киллэрдилэр – улууска үлэлиир түөрт үөрэх тэрилтэтигэр киирбит устудьуоннар бастакы сылларын куоракка үөрэниэхтэрэ. Хайдах?
edersaas.ru
Ити туһунан “Саха сирэ” хаһыат ыыппыт “төгүрүк остуолугар” СӨ үөрэҕин уонна наукатын миниистирин солбуйааччы Ньюргуна Соколова сиһилии кэпсээн турар. Дьокуускайдааҕы педагогическай, медицинскэй, Дьокуускайдааҕы үп-экэниэмикэ кэллиэстэригэр сыллата иккилии тыһыынчаҕа тиийэ сайаапка киирэр. Оттон үрдүк хамнастаах, кэскиллээх идэҕэ үлэһит илии сүрүннээн бырамыысыланнай оройуоннарга тиийбэт. Туһааннаах улуустарга үөрэх тэрилтэлэрэ эмиэ бааллар эбээт. Ол эрээри, абитуриеннар үөс сиргэ – Дьокуускай куоракка талаһаллар. Ньюргуна Соколова: “Үлэ миэстэтэ бырамыысыланнай оройуоннарга баар, үөрэххэ туттарсааччылар үгүстэрэ тыа улуустарыттан сылдьаллар, онон бары Дьокуускай куоракка үөрэниэхтэрин баҕараллар. Инньэ гынан, бырабыыталыстыба бэрэссэдээтэлэ Владимир Солодов көҕүлээһининэн, ситимнээх бырагырааманы саҕалаан эрэбит. Тустаах бырагыраамаҕа олоҕуран быйылгыттан түөрт кэллиэс – Нерюнгритааҕы Саха сирин соҕурууҥҥу кэллиэһэ (Южно-Якутский технологический колледж), Алданнааҕы политехническэй тиэхиньикум (Алданский политехнический техникум), Мирнэйдээҕи региональнай тиэхиньиичэскэй кэллиэс ( Региональный технический колледж в г. Мирном), Хаандыгатааҕы хайа-геологическай тиэхиньикума (Горно-геологический техникум в п. Хандыга) абитуриеннартан докумуоннары Дьокуускай куоракка тутуохтара уонна маҥнайгы куурустарын куоракка үөрэтиэхтэрэ. Маҥнайгы куурустарын түмүктээн баран, иккис-үһүс куурустарга үөрэххэ киирбит сирдэригэр, улууска баран үөрэниэхтэрэ”, — диэн быһаарда. Дьиҥэр, киһи идэтин үөрэх эрэ буоллун диэн талбакка, олоҕун тухары үлэлиир, ону ааһан үрдүк хамнастаах, дьиэ кэргэнин хааччыйар туһугар сөпкө талара ирдэнэр. Ол эбэтэр куоракка дуу, улууска дуу үөрэнэрэ улахан тутулуга суох.
Иккиһинэн, кэлин орто анал үөрэх тэрилтэлэрэ Саха сирин тас өттүгэр баар бастыҥ тэрилтэлэри кытта дуогабардаһан хото үлэлииллэр. Холобур, быйыл Покровскайдааҕы кэллиэс бииргэ үлэлэһиигэ Казань куорат тиэхиньикумун кытта илии баттаспыта. Покровскай кэллиэһигэр киирбит бастыҥ көрдөрүүлээх устудьуоннар иккис куурустарын эбэтэр үөрэх ханнык эрэ модулун бүддьүөт суотугар босхо Казань куоракка баран үөрэнэр кыахтаннылар. Кэлин, баҕар, үөрэҕин Казаҥҥа да үрдэтиниэн, сөбүлээтэхтэринэ үлэлии даҕаны хаалыахтарын сөп.
Онон биир миэстэҕэ аҕыстыы-уончалыы киһи куонкурустаах Дьокуускай куоракка баар үөрэх кыһаларыгар эрэ болҕомтону уурбакка, улуус үөрэхтэрин тэрилтэлэрин диэки хайыһар кэм кэллэ. Дьолго, бүддьүөт миэстэтэ хото көрүллэр, үлэ да булаллара судургу.
Людмила ПОПОВА, “Саха сирэ” хаһыат, edersaas.ru
Хаартыска интэриниэттэн.