Саха Өрөспүүбүлүкэтин Ил Дархана Айсен Николаев сорудаҕынан уонна өрөспүүбүлүкэ Суһал штабын быһаарыытынан Быраас ыраахтан аудио-консультациятын киинэ аһылынна.
СӨ Доруобуйаҕа харыстабылын министиэристибэтэ арыйбыт киинигэр ОРВИ, ол иһигэр коронавируһу сэрэтии уонна эмтэнии туһунан сүбэ-ама биэриэхтэрэ.
Саха сирин хайа баҕарар ыраах сытар нэһилиэгин олохтооҕо, эмчиттэр эбэтэр эмтиир пууннар суох түгэннэригэр, бу Кииҥҥэ эрийэр кыахтаныа. Ол курдук, өрөспүүбүлүкэ олохтоохторо, мэдиссиинискэй тэрилтэҕэ сылдьыбакка эрэ, быраас сүбэтин-аматын ылар өҥөлөрө аан бастаан тэрилиннэ.
Киин үлэтигэр, Дьокуускайга колл-кииннэр үлэлэригэр курдук, мэдиссиинэ институтун преподавателлара, өрөспүүбүлүкэ анал мэдиссиинискэй тэрилтэлэрин сүрүн исписэлиистэрэ кыттыһыахтара.
Киин бүгүҥҥүттэн, олунньу 6 күнүттэн, үлэтин саҕалаата.
Өрөбүлэ уонна бырааһынньык күннэрэ суох, 08.00-20.00 чааска диэри үлэлииллэр. Ыраахтан олорор сүбэни-аманы ыларга 8-800-100-14-03 нүөмэргэ эрийиэххэ сөп.
Надежда ЕГОРОВА, «Саха сирэ», edersaas.ru