Соторутааҕыта Национальнай бэчээт күнүн бэлиэтээтибит. Өймөкөөн улууһун сахалыы тыллаах «Хотугу сардаҥа» хаһыат хайа күн төрүттэниэҕиттэн, уопсастыбаннай кэрэспэдьиэннэринэн баай.
edersaas.ru
Улуус хаһыаттарын уопсастыбаннай кэрэспэдьиэннэрэ, Национальнай бэчээти сайыннарыыга төһүү күүһүнэн буолаллар.
«Хотугу сардаҥа» хаһыат биир актыыбынай селькорунан Тымныы полюһунан аан дойдуга биллэр Өймөкөөн нэһилиэгин олохтооҕо Прокопий Ксенофонтов буолар. Прокопий Николаевич Үөһээ-Бүлүү улууһун Боотулуу нэһилиэгиттэн төрүттээх.
Уопсастыбаннай кэрэспэдьиэн туһунан «Хотугу сардаҥа» хаһыат үлэһитэ Надежда Корякина бу курдук кэпсиир:
— Н.Г. Чернышевскай аатынан Бүлүүтээҕи педагогическай училищены бүтэрэн баран, Прокопий Ксенофонтов Дьокуускайдааҕы судаарыстыбаннай университекка кэтэхтэн үөрэммитэ. 1976-1978 сс. Үөһээ-Бүлүү “Коммунизм сардаҥата” хаһыат литературнай үлэһитэ. Онтон кэргэнин, учуутал идэлээх Валентина Михайловна дойдутугар, Өймөкөөҥҥө көһөн кэлэн, 1979 сыллаахтан бу сири иккис дойду оҥостон олорор. “Өймөкөөн ураты айылҕатын сэргэ, эйэҕэс дьонун-сэргэтин умсугуйа таптаатым, биллим, доҕордостум” диир Прокопий Николаевич. Манна кини саха тылын учууталынан, иитээччинэн, интэринээт сэбиэдиссэйинэн, “Сайдам” диэн оҕолорго уонна дьиэ кэргэҥҥэ социальнай көмөнү оҥорор кииҥҥэ, ОДьКХ-ҕа үлэлээбитэ. 1990-1993 сс., дойду үрдүнэн уустук, кыһарҕаннаах кэмҥэ, 1-кы Бороҕон нэһилиэгин Сэбиэтин бэрэссэдээтэлинэн талыллан үлэлии сылдьыбыта. 1991 с. С.В. Обручев төрөөбүтэ 100 сылыгар папанинскай эспэдииссийэ Өймөкөөн улууһугар кэлэ сылдьыбытыгар, Прокопий Николаевич туох кыалларынан, билиитинэн көмөлөһөн, улахан махталы ылбыта. Эспэдииссийэ чилиэннэрэ кинини Москваҕа “Отчуот биэчэригэр” бочуоттаах ыалдьыт быһыытынан ыҥырбыттара.
Үлэ бэтэрээнэ, айар куттаах Прокопий Ксенофонтов — суруйааччылар сойуустарын норуоттар икки ардыларынааҕы холбоһуктарын, Саха сиринээҕи Суруйааччылар сойуустарын, РФ Суруналыыстарын сойууһун чилиэнэ, Н.М. Заболоцкай-Чысхаан аатынан улуустааҕы литературнай бириэмийэ лауреата.
Прокопий Ксенофонтов оскуолаҕа 7-с кылааска үөрэнэ сырыттаҕына, учуутала ПрокопийПрокопьев үөрэнээччитин дьоҕурун таба көрөн, кини үөрэтэн-такайан айар үлэҕэ ылсыбытын бүгүн истиҥник ахтар. Оччолорго уол хоһоонноро бастаан оскуола эркин хаһыатыгар тахсыбыттар, онтон оройуоннааҕы хаһыакка бэчээттэнэн барбыттар. Итинтэн ыла саҕаламмыт, уопсастыбаннай кэрэспэдьиэн айар үлэтэ. Прокопий Николаевич билигин Өймөкөөн нэһилиэгэр бэйэтэ тэрийбит “Дабаан” литературнай куруһуогар эдэр көлүөнэни айар үлэҕэ уһуйар. Маны сэргэ, кырдьаҕас суруйааччы дыраама тыйаатырын артыыһа. Кини оонньуурун сөҕө, хайгыы, киэн тутта көрөөччүбүт.
Прокопий Ксенофонтов уопсайа алта кинигэ ааптара — “Туруйа хаһыыта” (2001 с.), “Тэһийэр сирим” (2010 с.), “Көрсө туруох, көлүөнэм” (2012 с.) “Сүрэххэ сөҥмүт санаалар” (2011), “Чуурукта чуумпуга сипсийэр” (2011 с.) уонна “Хара сирэм” (2015 с.).
Ити курдук Прокопий Николаевич Ксенофонтов бочуоттаах сынньалаҥҥа олорон, айар үлэнэн утумнаахтык дьарыктанар. “Киһи олорорун тухары айыахтаах-тутуохтаах” диир ытык киһи.
Елена ПОТОЦКАЯ, «Саха сирэ» хаһыат, edersaas.ru