Кэлэр сылтан улуус хаһыаттара биир порталланыахтара. Бу туһунан СӨ Сибээһин уонна информационнай технологияларын министиэристибэтэ иһитиннэрдэ.
Тыа сиригэр интэриниэт мөлтөх. Тоҕо эмиэ сайт оҥороллор дии саныаххыт. Ол эрээри төрөөбүт дойдуларыттан тэлэһийэ сылдьар дьон улуустарын сонуннарын, хаһыаттарын интэриниэккэ киирэн ааҕар кыахтаныахтара. Бу үчүгэй буолбатах дуо?
Икки тылынан үлэлиэхтээх интэриниэт-сайт бырайыагын «Сахамедиа» РИИХ оҥорон, бу күннэргэ туһааннаах министиэристибэ көрүүтүгэр киллэрдэ. Миниистири солбуйааччы Чокуур Гаврильев этэринэн, оннооҕор ыаллыы олорор улуустар бэйэ-бэйэлэрин сонуннарын, туох хайдах олороллорун билбэттэр. Аны олохтоох хаһыаттан ураты, сонуну түргэнник дьоҥҥо тириэрдэр ханаал суох. Улуус хаһыаттара сайтаныахтарын баҕарбыттарын да иһин, сибээс, интэриниэт бытаан, хаачыстыбата мөлтөх итиэннэ базалара суох диэн эбэн этэр. Портал аата чуолкайдана илик, баҕар, уларыйыаҕа.
Бырайыакка сурулларынан, сайт ulus.ru диэн ааттаныахтаах. Манна өрөспүүбүлүкэ хас биирдии улууһугар анал страница баар буолуохтааҕын таһынан, хаһыаттарын архыыба pdf форматынан киллэриллиэхтэрэ. Сайт 2018 сылга олунньу 1 күнүттэн үлэҕэ киллэриллиэхтээх.
Анивера Акимова, «Саха сирэ» хаһыат, edersaas.ru