Ил Дархан Айсен Николаев улуус баһылыктарын кытта селекторнай мунньаҕы ыытта.
edersaas.ru
Баһылыктары кытта видео-сибээһинэн кэпсэтиигэ Ил Дархан муҥутуур ыксаллаах быһыы-майгы биллэриллибитинэн сибээстээн, улуустарга маассабай култуурунай тэрээһиннэри олоччу боборго эттэ.
Маны таһынан, баһылыктар бородууктанан хааччыллыы боппуруоһун сиһилии үөрэтэллэрэ наада. Онон ааҕыы-суоттааһын олохтоохтук ыытыллыаҕа. Ыксаллаах быһыы-майгы үөскээбитинэн туһанан, сорох урбаанньыттар сыананы үрдэтэллэрин кытаанахтык хонтуруоллууллара ыйылынна. Бары улуустарга коронавируска уорбаланар дьону көрөр-истэр обсерваттар аһыллыахтаахтара бэлиэтэннэ. Онно дьон доруобуйатын чинчийиигэ сөптөөх усулуобуйа тэриллиэхтээх (балааталарга түөртүү киһиттэн элбэх киһи сытыа суохтаах). Промышленнай улуустарга баахтанан үлэлиир дьоҥҥо болҕомтону күүһүрдэргэ сорудахтанна.
Ил Дархан оройуоннарга тэриллибит оперативнай ыстааптар төгүрүк сууккаҕа үлэлиир эрэсиимҥэ киирэллэрин туһунан иһитиннэрдэ.
— Ыксаллаах быһыы-майгы үөскээбитинэн сибээстээн, өрөспүүбүлүкэ оперативнай ыстаабыгар иһитиннэрии чааһынан буолбакка, мүнүүтэнэн бэриллэ туруохтаах, — диэн бэлиэтээтэ Ил Дархан.
Маны таһынан, Айсен Николаев маасабай тэрээһиннэр тохтотуллубуттарынан сибээстээн, үлэ биэрээччилэр үлэһиттэрин сарсыардааҥҥыттан киэһээҥҥэ диэри туппаттарыгар, үгүс тэрилтэлэргэ үлэһиттэрин дьиэлэриттэн олорон үлэлииллэрин хааччыйарга сүбэлээтэ.
Улуустар баһылыктарыгар командировкаларын, айаннарын тохтотоллоругар сорудахтанна.
— Селекторнай мунньахтар нэдиэлэҕэ иккитэ буолуохтара. Онон бары баһылыктар миэстэлэригэр баар буолуохтарын наада, — диэн Ил Дархан бэлиэтээтэ.
Елена ПОТОЦКАЯ, «Саха сирэ» хаһыат, edersaas.ru
Хаартыска — СИА.