Министиэристибэ сарсыарда аайы улуус эмчиттэрин үлэлэрин хонтуруоллуур
Өймөкөөн улууһун Уус-Ньара олохтоохторун икки саастаах оҕолоро улаханнык ыалдьан, сүүрбэччэ хонук устата киин балыыһаҕа эмтэнэн үтүөрбэккэ сытар. edersaas.ru
Эмчиттэр «инньэ-манньа диэбиттэр», «итинник эмтээбиттэр» диэн эмтэр толору ааттара суруллубут улуустааҕы батсаап бөлөхтөрүгэр оҕо ыалдьыбытын туһунан араас сурах-садьык тарҕаммыта. Дьаһалта баһылыга Михаил Захаров оҕо ийэтин кытта кэпсэтэн, дьыала ис дьиҥин билэн баран, киин балыыһа кылаабынай бырааһа Владимир Коголлыын кэпсэппитэ. Ол кэннэ Доруобуйа харыстабылын миниистирэ Михаил Охлопковы кытта сүбэлэспитэ. Баһылыгы кытта кэпсэтии кэнниттэн бу түбэлтэни Доруобуйа харыстыбылын министиэристибэтэ бэйэтин болҕомтотугар ылан, оҕо доруобуйатыгар телемедициинэ нөҥүө анал консультация ыыттылар. Ол түмүгэр икки саастаах оҕо доруобуйатын Дьокуускайга анал клиникаҕа бэрэбиэркэлиэхтэрэ. Бүгүн Уус-Ньараттан киин балыыһа эмчитэ оҕону ийэтин кытта сөмөлүөккэ арыаллаан, Национальнай медицинскэй киин 1 №-дээх балыыһатын педиатрия киинигэр тиэрдиэҕэ.
Онон батсаап иһитиннэриитэ икки өрүттээҕэ көстөн таҕыста. Бастакынан, сүүрбэччэ хонукка туга ыалдьара биллибэтиттэн (диагноһа биллибэт эбит), доруобуйата мөлтөөн испит оҕо дьылҕата хайдах буолуо биллибэт этэ. Онон батсаап «оргуйан», кырачаан киһиэхэ тустаах болҕомто уурулунна. Иккиһинэн, араас сурах-садьык төһө уһуннук баран, туох айдаан тахсыаҕа биллибэт этэ. Онуоха улуус салайааччыта боппуруоска кэмигэр орооһон, кырдьыктаах иһитиннэрии утары тахсан биэрдэ. Онон бэйэлэрин тустарыгар хобу-сиби туһанааччылар айахха бэрдэрдилэр. Үсүһүнэн, батсаапка: «Ыксаабыт түбэлтэҕэ ханна кимиэхэ тахсыахха сөбүй?» — диэн олус сөптөөх ыйытыы туран, интернет ситимигэр тустаах биэдимистибэттэн барыбытыгар да олус наадалаах иһитиннэрии кэллэ. Ол курдук, 2017 сыл ахсынньы ыйтан СӨ Доруобуйа харыстабылын министиэристибэтэ улуустарга ыарыһахтар доруобуйаларын туругун хонтуруоллуур Быһыы-майгы киинин үлэтин саҕалаабыт. Күн аайы сарсыарда министиэристибэ үлэһиттэрэ бу киин нөҥүө улуустардааҕы киин балыыһалар кылаабынай быраастарын кытта ыарыһахтар доруобуйаларын туругун билсэллэр эбит. Ол эбэтэр ханнык-туох ыарыылаах ыарахан ыарыһах баарын, хас оҕо туох ыарыылаах сытарын билсэллэр, сүбэлэһэллэр. Үлэ бу көрүҥэ быраастар эппиэтинэстэрин күүһүрдэр уонна ыарыһахтарга кэмигэр туох көмө оҥоһулларын хонтуруоллуур.
Доруобуйа харыстабылын министиэристибэтэ уустук балаһыанньаҕа түбэспит дьону маннык төлөпүөннэргэ эрийэн билсэргитигэр сүбэлиир: 8-800-250-47-14; суһал ыарыһахтарга: 507 — 000 уонна интернетинэн www.er14.ru