СӨ Үөрэҕин уонна наукатын миниистирэ Михаил Сивцев көҕүлээһининэн, үөрэх тэрилтэлэрин 30-тан тахса үлэһитэ бүгүн, Улуу Кыайыы күнүгэр, 9 килэмиэтири сүүрдүлэр.
Кинилэр сүүрүүнү саҕалыахтарын иннинэ, Кыайыы болуоссатыгар Умуллубат уокка тыыннаах сибэкки дьөрбөтүн уурдулар. Кыайыы күнүгэр анаммыт сүүрүүгэ Дьокуускайдааҕы кадеттар оскуолаларыттан, эдэр педагогтар Ассоциацияларыттан, СӨ Үөрэҕин уонна наукатын министиэристибэтиттэн уонна атын үөрэх эйгэтин тэрилтэлэриттэн кытыннылар. Бу туһунан СӨ Үөрэҕин уонна наукатын министиэристибэтин пресс-сулууспата иһитиннэрдэ.
«Кыайыы күнэ — дойдубут хас биирдии олохтооҕор уһулуччу улахан суолталаах. Бу Аҕа дойдуну хорсуннук-хоодуоттук көмүскээбит ытык дьоммутун ахтар-саныыр, кинилэр сырдык ааттарыгар сүгүрүйэр күммүтүнэн буолар. Сыллар-хонуктар субуллан ааһаллар, көлүөнэни көлүөнэ солбуйар, ол гынан баран, Улуу Кыайыы туһунан өйдөбүл хаһан да умнуллубат.
Биһиги эйэлээх олоҕу аҕалбыт ытык дьоммутунан киэн туттабыт. Ытык дьоммут, күндү бэтэрээннэрбит дьоруойдуу хорсун-хоодуот быһыыларын кэриэстиибит. Сэрии ыар сылларын аас-туор кэмигэр тыыл үлэһиттэрэ утуйары да умнан туох баар сыраларын-сылбаларын ууран үлэлээбиттэрин, алдьархайдаах сэрии урусхаллаабыт куораттарын тутарга, норуот хаһаайыстыбатын өрө көтөҕөргө бэйлэрин харыстаммакка дьүккүөрдээхтик үлэлээбиттэрин өйдүү-саныы сылдьыахпыт.
Ытык дьоммут уһансыбыт эйэлээх олохторугар биһиги дьоллоохтук олоробут, үлэлиибит, сайдабыт.
Ис сүрэхпититтэн эһиэхэ, ытык кырдьаҕастарбытыгар этэҥҥэ буолууну, доруобуйаны, дьолу, үөрүүнү, эйэлээх халлааны баҕарабыт! Бырааһынньыгынан! Улуу Кыайыы күнүнэн!», — диэн миниистир Михаил Сивцев эттэ.
+1
+1
+1
+1
+1
+1
+1