Кыайыы Знамята күөрэйдэ

Бөлөххө киир:

Дьокуускай куорат Өрөгөйдөөх Улуу Кыайыы 74 сылын көрсөргө бэлэм. Бүгүн, ыам ыйын 8 күнүгэр,  Кыайыы болуоссатыгар Улуу Кыайыы знамята эйэлээх күөх халлааҥҥа күөрэйдэ. 


Долгутуулаах тэрээһиҥҥэ бэтэрээннэр, бырабыыталыстыба чилиэннэрэ, депутаттар, улуу Туймаада хочотун олохтоохторо, ыалдьыттар уонна ыччат түмүстэ. Болуоссакка мустубут бар дьон  уоттаах сэриигэ дьоруойдуу охтубуттар, тыылга өлбүттэр, уоттаах сэрии бары сиэртибэлэрин сырдык ааттарыгар кэриэстэбил мүнүүтэҕэ саҥата суох соҥуоран турдулар.

Салгыы СӨ байыаннай комиссара, полковник  Демир-Оол Артын хамаандатынан Улуу Кыайыы быстыбат бэлиэтэ — Кыайыы Знамята киллэрилиннэ. Кыайыы Знамятын Аҕа дойду улуу сэриитин кыттыылааҕа Кирилл Егорович Павлов уонна «Айыы кыһатын» 11-с кылааһын киэн туттар үөрэнээччитэ  Емельян Иванов күөрэччи көтөхтүлэр.

Ил Түмэн Судаарыстыбаннай мунньаҕын бэрэссэдээтэлэ Петр Гоголев бу улахан долгутуулаах күнүнэн Аҕа дойду улуу сэриитин кыттыылаахтарын, тыыл бэтэрээннэрин, болуоссакка мустубут бар дьону эҕэрдэлээтэ. Саха сириттэн Аҕа дойду улуу сэриитигэр 62 тыһыынчаттан тахса киһи фроҥҥа барбытын, онтон үксэ сэрии толоонугар сырдык тыынын толук биэрбитин, тыылга кырдьаҕастар, дьахталлар, оҕолор Кыайыыны уһансар туһугар күүстэрин харыстаабакка түүннэри-күннэри үлэлээбиттэрин, уоттаах сэрии хас биирдии дьиэ кэргэҥҥэ улахан содуллаах буолбутун, Улуу Кыайыы бырааттыы норуоттар эйэлээх олоххо дьулуурдарынан, сомоҕолоһууларынан, кэрэҕэ, сырдыкка тардыһыыларынан ситиһиллибитин этэн туран, бары өйбүтүгэр-санаабытыгар, сүрэхпитигэр-быарбытыгар иҥэринэн сылдьарбытыгар, эйэлээх олоҕу уһансыбыт ытык дьоммутугар сүгүрүйэр ытык иэстээхпитин бэлиэтээтэ.

Аҕа дойду улуу сэриитин бэтэрээнэ Кирилл Павлов долгутуулаах уонна үөрүүлээх тэрээһин кыттыылаахтарыгар туһаайан: «74 сыл анараа өттүгэр, 1945 сыллаахха, 150-с Идрицкэй стрелковай дивизия байыастара  М.Кантария, М.Егоров лейтенант А.Берест хамаандатынан рейхстакка Кыайыы Знамятын күөрэччи көтөхпүттэрэ. Бу Сэбиэскэй норуот Аҕа дойду улуу сэриитигэр хара дьайдаах фашистары Кыайыытын умнуллубат бэлиэтэ, — диэтэ.

Дьокуускай куорат дьаһалтатын баһылыга Сардаана Авксеньтева улуу кыайыыны уһансыбыт ытык дьон олохторун салҕааччылар, утумнааччылар буолан тураммыт, бүгүн ытык дьоммутугар сүгүрүйэн тураммыт Кыайыы Знамятын күөрэччи көтөҕөбүт диэн эттэ. «Биһиги өйдүүрбүт, саныырбыт, ахтарбыт тухары, биһиги дьоруойдарбыт, биһиги Ийэ дойдубутун Аҕа дойду улуу сэриитигэр хара дьайдаах фашистартан көмүскээбит, дьоллоох, уйгулаах олоҕу бэйэлэрин олохторун толук биэрэллэрин кэрэйбэккэ туран уһансыбыт ытык дьоммут тыыннаахтар. Биһиги кинилэр тустарынан эдэр көлүөнэҕэ, кэнчээри ыччакка өйдөрүгэр-санааларыгар, сүрэхтэригэр-быардарыгар иҥэрэр ытык иэстээхпит. Өрөспүүбүлүкэ бэтэрээннэрин сэбиэтин туруорсуутунан, этиитинэн, Ил Дархан Айсен Николаев быйылгы сыл ыам ыйын 9 күнүттэн 2020 сыл ыам ыйын 9 күнүгэр диэри ытык кырдьаҕастарбытын, бэтэрээннэрбитин ахтар-саныыр, чиэстиир, көлүөнэлэр сүрэхтэригэр иҥэрэр туһуттан анал сылынан биллэрбитэ сөптөөх. Бу буолуоҕа, биһиги дьоммутун-сэргэбитин сүрэхпитигэр өрүү чугастык тутан саныырбыт, кинилэр ааттарын сүгүрүйэн туран ааттыырбыт. Бука барыгытыгар чэгиэн доруобуйаны, эйэлээх халлааны, — диэтэ истиҥ эҕэрдэтин тиэртэ.

Сардаана БАСНАЕВА, «Саха сирэ» хаһыат, edersaas.ru

Хаартыскаларга Мария Васильева (СИА) түһэриилэрэ.

+1
0
+1
0
+1
0
+1
0
+1
0
+1
0
+1
0